– Eg æti mær at spæla í fremstu røð næsta kappingarár.
Tað segði Jann Ingi Petersen, tá ið tað á seinasta leikdegi í heyst var greitt, at barndómsfelag hansara, B68, næsta kappingarár skal spæla í næstbestu deildini. Nú er ætlanin hjá miðvallaranum vorðin veruleiki.
Víkingur boðar frá á heimasíðu síni, at felagið og Jann Ingi Petersen hava skrivað undir sáttmála, sum bindur partarnar at hvørjum øðrum í tvey ár.
Felagið sigur seg hava leitað eftir einum profili at taka uppgávuna á seg á miðvøllinum, nú tað er greitt, at tríggir teirra, sum hava verið við til at manna miðvallarplássini, ikki longur verða í felagnum. Her verður hugsað um Evrard Blé, Sølva Vatnhamar og Fritleif í Lambanum. Í Jann Inga heldur Víkingur seg hava funnið rætta generalin á miðvøllinum.
Jann Ingi Petersen hevur spælt 177 dystir í bestu deildini, 38 steypadystir og 8 europeiskar dystir. Tilsaman hevur hann skorað 40 mál í vaksnamannadeildunum. 22 ferðir hevur Jann Ingi umboðað Føroyar í A-landsdystum.
– Vit í Víkingi eru sera fegin um, at Jann Ingi hevur valt at spæla við okkara felaga, tey komandi tvey kappingarárini. Við at knýta ein tílíkan profil til okkara hóp, ynskja vit at senda eitt greitt signal um, at vit framhaldandi ynskja at verða vit til at mynda toppin av føroyskum fótbólti, verður sagt á heimasíðuni vikingur.fo
