Fyritøkan JT electric á Kambsdali, sum ikki minst er kend fyri sítt trolkamera, hevur vunnið eina útbjóðing í Kanada, har ein granskingarstovnur undir kanadisku stjórnini skal hava tvær kameraskipanir - og fýra skipanir tilsamans - til granskingarverkætlan í arktis.
Útbúnaðurin, sum verður keyptur frá JT electric, verður soleiðis ein partur av granskingarútgerðini.
Ymiskir pakkar
Rúni Petersen er sølu-og marknaðarleiðari av trolkameranum, og hann hevur eisini ábygdina av, at menningin av eitt nú kameranum ikki stagnerar, men heldur fram.
- Vit hava vunnið útbjóðingina, sum kanadiski staturin skipaði fyri. Talan er um tvær kameraskipanir og tvær ljósskipanir.
Hann vísir á, at trolkamera’ini hava innbygdan ljósmøguleika, men í hesum førinum vilja kanadiumenn hava eykaljós innbygt í skipanina.
- Vit hava annars tríggjar slíkar skipanir - ella pakkar - við ymiskum møguleikum í útboði, leggur Rúni aftrat.
Eisini í Japan
Umframt at selja sínar skipanir til føroysk reiðaríir, hevur JT electric eisini selt fleiri trolkamera til stóra amerikanska reiðaríið, American Seafood Company í Seattle. Men fyritøkan á Kambsdali hevur eisini selt skipanir til onnur lond, bæði nær og fjar.
- Nú hava vit so eisini fingið okkara fyrsta sáttmála í Japan, og hesin sáttmáli kom í lag í sambandi við eina messu í Danmark, sigur Rúni Petersen.
Nógv orka
JT electric hevur luttikið á ymiskum fiskivinnustevnum, har framleiðarar og útbjóðarar sýna fram sínar vørur, eins og keyparar leita fram við at síggja tað nýggjasta innan tøkni.
Fyritøkan, sum seinnu árini hevur lagt nógva orku í trolkameraið, hevur eisini luttikið á fiskivinnustevnuni, Pacific Marine Expo í Seattle.
