Tað vóru ikki tey stóru tíðindini at frætta undan ríkisfundinum. Tí hann er óformligur á tann hátt, at eingin dagsskrá verður gjørd. Heldur ikki eru embætisfólk við á fundinum, tá Motzfeldt, Kallsberg og Nyrup Rasmussen sessast um fundarborðið.
Anfinn Kallsberg løgmaður, segði áðrenn hann fór avstað gjáramorgunin, at hann fór at rógva aftur á tey mál, sum hava verið umrødd millum Danmark og Føroyar, eitt nú flogvøllin í Vágum, ES -mál, sjóverjuna og uttanríkismál.
? Hetta eru mál, sum vit eru felags um, og sum vit hava tosað við Niels Helveg Petersen, uttanríkismálaráðharra og Nyrup Rasmussen, forsætisráðharra, tá teir hava vitjað í Føroyum, sigur Anfinn Kallsberg.
Seinasti ríkisfundur var í Føroyum 6. januar í fjør. Tá var Edmund Joensen løgmaður.
Løgmaður segði, at hann ikki hevur stórvegis viðmerkingar til ríkisfundin í gjár, av tí at hann ikki hevur verið við áður, og tí ikki veit stórvegis um, hvussu farið verður fram á slíkum fundi.
Hóast embætisfólkini ikki sleppa á ríkisfundin, eru tey kortini við á ferðini, av tí at tey skulu fundast fyri seg.
Meira kemur um fundin seinni.
