Øssur man vera ein hin kendasti fjølmiðlamaðurin í Føroyum. Longu í sjeytiárunum var hann at hoyra í útvarpinum, áðrenn hann byrjaði á Danmarks Journalisthøjskole, har hann hevur nomið sær útbúgving sum journalistur.
Hann var journalistur í Sjónvarpi Føroya, tá tað var nýtt, og hann tann vegin gjørdist hann landskendur.
Hann flutti seinni til Danmarkar, har hann saman við Dánjali Højgaard stovnaði blaðið Føringin, har teir báðir royndu seg við óheftum kritiskum journalistikki.
Øssur flutti aftur til Føroya síðst í nítiárunum og fór aftur í starv í Sjónvarpi Føroya – nú sum tíðindaleiðari, eitt starv, hann røkti til Sjónvarp Føroya og Útvarp Føroya vórðu løgd saman fyri góðum 20 árum síðani.
Øssur Winthereig starvaðist eitt skifti saman við okkum á Sosialinum í blaðhúsinum á Argjum fyrst í hesi øldini.
Hann var kendur fyri sín kritiska journalistik. Vit onnur í miðlavinnuni eru mangan sett upp á pláss av Øssuri, sum ikki legði fingrarnar ímillum, tá hann fanst at okkum. Hann kundi vera sera hvassur, so tað sveið, men hann hevði altíð grein í tí, sum hann segði.
Hann var veruliga ein kritiskur journalistur.
Tað minnast vit hann við virðing fyri.
