Í síðstu viku var tað friðingin á landleiðini, sum var sett úr gildi, uttan at løgmaður visti av tí. Nú eru tað tey rullandi fiskiloyvini, sum skulu halda fram eftir 2018.
Og løgmaður sigur, at tað var gegnið hjá Jákup Mikkelsen, sum gjørdi, at hann gav honum fótin. Ikki politiska arbeiðslagið, tí »hann var ein dugnaligur landsstýrismaður, sum eg havi stóra respekt fyri«, segði løgmaður.
Vit meina tað...
Nú er tað Kári Post, sum er farin at ressast. Honum hóvar heldur ikki fiskivinnupolitikkin hjá Fólkaflokkinum, sum er fiskivinnupolitikkurin hjá landsstýrinum, um gamla Sjálvstýrið og Sambandið vilja tað ella ikki.
Men Sjálvstýrisflokkurin tekur altso frástøðu frá uppskotinum, um eina 12 ára rullandi loyvisskipan. Kári Post sigur, at hon var ikki kend, áðrenn hon varð kunngjørd í miðlunum.
– Sjálvstýrisflokkurin hevur ikki verið við til at viðgjørt uppskotið, sum ímóti vanligari siðvenju, er sent Fiskivinnuráðnum og felagnum Peningastovnum til hoyringar, uttan at samgongufelagar ella landsstýrið á nakran hátt er kunnað. Tí má uppskotið standa fyri egna rokning fráfarna landsstýrismansins í fiskivinnumálum, sigur Kári Post í tíðindaskrivi.
