Ljósfest verður á fjórða sinni í Vági um vikuskiftið.
Tað var í 2021, at Vágs kommuna, tá saman við SEV, gjørdi av at hátíðarhalda, at fyrsta el-verk í Føroyum gjørdist 100 ár. Hetta er el-verkið í Botni í Vági.
Seinni varð gjørt av at halda fram við hesum væleydnaða tiltakinum, og verður Ljósfest í Vági nú á fjórða sinni.
Hyggja vit í søguna, so hava tó ljósfestir verið fyrr í Vági. Hetta var í 1921 og nøkur ár fram, fyri at hátíðarhalda fyrsta elverk í Føroyum og í danska kongaríkinum – el-verkið í Botni.
Hesaferð, í 2024, er tað Kirstin Strøm Bech, ið setir Ljósfestina. Kirstin Strøm Bech er fødd í Vági í 1956, og hon er fyrrverandi borgarstjóri í Vági – frá 2005 til 2012.
Kirstin stillaði upp fyri Javnaðarflokkin og varð fyrstu ferð vald í býráðið í november 2004 og varð av býráðnum vald til borgarstjóra. Hon var borgarstjóri frá 1. januar 2005. Til valið í november 2008 varð hon afturvald og helt fram sum borgarstjóri eitt valskeið afturat. Kirstin Strøm Bech gjørdist stýrislimur í Kommunusamskipan Føroya, tá hon gjørdist borgarstjóri, hon var næstformaður frá 1. juli 2006 til 31. desember 2008.
Hon sat aftur í Vágs býrað setuna 2017-2020.
Kirstin Strøm Bech er útbúgvin fólkaskúlalærari. Hon setir ljósfest 2024 á stóra pallinum klokkan 18:20 leygardagin 17. august.
