Tað er Woody Allen, sum sigur hesa søguna í tiltikna filmi sínum Annie Hall.
Kanska kundi hendan fitta og sigandi søgan verið søgd í fólkaskúlanum, sum fór skeivur í Pisa, og nú stríðist fyri at koma aftur á beint.
Nógv uppskot og hugskot eru um, hvussu fólkaskúlin skal betrast, og standa seg betur í næstu Pisa-kanningini. Eitt hugskot er, at børnini skulu fyrri í skúla. Eitt ár fyrr inn í skúlastovurnar til frálæru í 1. flokki – ella fjórðu división. Spurningurin er bara, um tað nyttar nakað at koyra børnini fyrri í skúla ella hava tey longri í skúlanum. Meira av tí sama gevur bara meira av tí sama.
Og so er tað fakliga diskussiónin, sum ongantíð fær verið meira enn fakfelagslig, tí øll vilja verja sítt. Har er niðurstøðan umaftur og umaftur, at milliónir av krónum skulu til, um nakað skal lata seg gera – betur.
Men tað loysir neyvan trupulleikan, at játtanin til fólkaskúlan verður vaksin við so nógvum prosentum, at at tey 75 prosentini av næmingunum í 9. flokki, sum vóru í skúla tann dagin, ikki klára at rokna tað út.
Kanska snýr hetta seg fyrst og fremst um, at lærarar og foreldur í felag taka avbjóðingina upp, vísa størri ábyrgd, seta veruliga krøv, og harvið betra um frálæruna av børnunum. Lærararnir klára tað neyvan einsamallir, foreldrini mugu eisini viðurkenna sína ábyrgd, og so skal skúlaskipanin eisini vísa dirvi og hugflog til at broyta frálæruna, um tað er neyðugt. Milliónirnar kunnu bíða eitt sindur.
Eitt par á veg út úr biohøllini.
- Var hasin filmurin ikki ræðuliga vánaligur, spyr konan.
- Jú, og so var hann so stuttur eisini!
