Í kvøld verða heiðurslønirnar hjá Norðurlandaráðnum handaðar í Oslo. Norðurlandaráðið letur heiðurslønir innan bókmentir, film, umhvørvi og tónleik.
Fleiri føroyingar eru í uppskoti at vinna eina heiðursløn í kvøld.
Rithøvundin Jóanes Nielsen er tilnevndur til bókmentaheiðurslønina fyri yrkingasavnið »Gudahøvd«.
Bárður Oskarsson er í uppskoti til heiðurslønina fyri barna- og ungdómsbókmentir fyri bókina »Træið«. Rakel Helmsdal er saman við tveimum øðrum rithøvundum tilnevnd til heiðurslønina fyri barna- og ungdómsbókmentir fyri bókina »Skrímsli í vanda«.
Hamferð er í uppskoti til tónlistaheiðurslønina.
Og Green IQ er tilnevnt til umhvørvisheiðurslønina.
Teir fimm vinnararnir fáa eina standmynd og 350.000 krónur.
Heiðurstiltakið hjá Norðurlandaráðnum verður sent í øllum norðurlondum kl. 18:45 í kvøld. Tað kann stroymast á heimasíðuni hja Kringvarpinum og verður sent í Sjónvarpinum eftir Dag & Viku.
