Ólafur var føddur og uppvaksin í Keflavík í Íslandi, sonur Janu, f. Ellefsen, ættað úr Miðvági, og Guðmund H. Ólafsson úr Keflavík.
Hann kom fyrstu ferð til Føroyar á heysti í 1948 til at fáa føroysk skip, ið fiskaðu við Ísland, at tekna seg fyri at keypa agnsild. Í 1949 búsettist hann í Føroyum. Hann avgreiddi íslendsk skip, sum løgdu inn í Føroyum.
Ólafur sá skjótt at grundarlag var fyri einum handli í Føroyum við íslendskum vørum og stovnaði handilin Impo í Vágsbotni. Hann fór undir at innflyta sjóklæðir og arbeiðsklæðir.
Hann seldi t.d. oljufýr, bildekk, íslendskar keks og ikki at gloyma ulpurnar. Eisini fekst hann nógv við at selja sild.
Ólafur virkaði í mong ár sum ein íslendskur umboðsmaður í Føroyum, hann fekk t.d. íslendsk skip hendan vegin til umvælingar á Tórshavnar Skipasmiðju. Hann skaffaði nógvum føroyingum arbeiði í Íslandi bæði við fiskiskipum og arbeiði í fiskivinnuni á landi.
Hann gjørdi nógv fyri at menna sambandi millum Ísland og Føroyar.
Í oktober 1998 fekk hann íslendska Falka-ordanin, ið kann sammetast við riddarakrossinum.
Ólafur eigur dóttrina Janu, sum býr í Pennsylvania í USA, har hon er gift og eigur fýra børn.
Seinastu tíðina var heilsan hjá Ólafi vánalig, og í mars í ár flutti hann aftur til Íslands. Nú hann andaðist, búði hann á ellisheiminum Garðvongur í Reykjanes býi.
Jarðarferðin verður í føðibýi hansara, Keflavík, fríggjadagin 27. august.
