Ígjár var tað eitt stórt vónbrot fyri landsliðsliðskiparan, Pernille Brandenborg og liðfelagarnar í CSM Bukarest at tapa hálvfinaluna í Super Cup kappingini í Rumenia.
Kappingin er fyri fýra tey fremstu liðini í undanfarna kappingarári.
Aftaná longda leiktíð tapti Bukarest 38-40 í hálvfinaluni fyri Gloria Bistrita. Tá vanliga leiktíðin var lokin stóð á jøvnum 34-34. Í steðginum var Bukarest á odda 19-17.
Í bronsudystinum í dag mátti Pernille og liðfelagarnir aftur spæla longda leiktíð. Men hesaferð koppaði tað til CSM Bukarest, ið vann 35-34 á Valcea. Aftaná vanliga leiktíð stóð á jøvnum 30-30. Í steðginum var Valcea á odda 17-16.
Landsliðsliðskiparin tók sum vant nógv tøk í verjuni.
Sunnudagin 30. august leggur CSM Bukarest fyri í bestu rumensku hondbóltsdeildini við grannauppgerð á útivølli móti Rapid Bukarest.
Í september fer CSM Bukarest eisini fyri í Champions League kappingini, so landsliðsliðskiparin verður væl fyri til EM-endaspælið síðst í november og fyrst í desember.
