Liðið hjá Hákuni West av Teigum, Füchse Berlin hevur eins og liðið hjá Óla Mittún, Sävehof, og liðið hjá Jóhan á Plógv Hansen, Flensburg-Handewitt vunnið seg í fjórðingsfinalurnar í EHF European League.
Füchse Berlin vann í kvøld 34-28 á Kadetten Schaffhausen úr Sveis. Füchse Berlin vann fyrra dystin 32-28 (16-15), og vann Füchse Berlin sostatt ein samlaðan 66-56 áttandapartsfinalusigur.
Füchse Berlin møtir franska liðnum, Nantes í fjórðingsfinalunum. Í hinari fjórðingsfinaluni fáa Óla og Jóhan høvið at hittast, tá Sävehof og Flensburg-Handewitt møtast.
Sävehof hevur heimadyst týsdagin, 23. apríl, og Flensburg hevur heimadyst týsdagin, 30. apríl.
Füchse Berlin spælir heimadyst móti Nantes týsdagin, 23. apríl, og útidyst eina viku seinni.