Nú verður møguligt hjá teimum, sum ynskja at lata seg kanna fyri CTD-sjúku, at fáa tikið eina blóðroynd á teimum trimum sjúkrahúsunum, á læknamiðstøðini í Gøtu og á heilsumiðstøðini í Vági, sigur Heilsumálaráðið í tíðindaskrivi.
Kostnaðurin fyri kanningina er 100 kr.
CTD-kanning av vaksnum og børnum
Til ber at lata seg kanna hesar tíðir:
Landssjúkrahúsið
Leygardagar - fyrstu ferð 14. november.
Til ber at taka nummar millum kl. 9-11. Royndir verða tiknar á B1 - til høgru við inngongdina til forhøllina.
Klaksvíkar Sjúkrahús
Mánadag - fríggjadag millum kl. 8-10 - fyrstu ferð mikudagin 11. november.
- Á læknamiðstøðini í Gøtu
Hósdag millum kl. 08.15 - 09.30 ? fyrstu ferð hósdagin 12. November.
Suðuroyar Sjúkrahús
Mánadag - fríggjadag millum kl. 8-13 - fyrstu ferð mikudagin 11. november.
Á heilsumiðstøðini í Vági
Týsdag og hósdag millum kl. 9-11 - fyrstu ferð hósdagin 12. november.
Praktisk viðurskifti
Tað er ikki neyðugt at fasta, áðrenn blóðroyndin til carnintin-máting verður tikin.
Gjaldast skal kontant 100 kr. ? tikið verður ikki móti gjaldskorti.
Persónar, ið hava ávísing frá kommunulækna kunnu framhaldandi fáa ókeypis kanning. Ávísing verður bert givin, um persónur hevur sjúkueyðkenni ella er í familju við ein, ið hevur fingið staðfest CTD-sjúku (talan skal verða um systkin, børn hjá systkjum, systkinabørn ella trímenningar).
PKU-kort
Sum eitt eyka átak, verður eisini farið undir at kanna carnitin-innihaldið í PKU-kortunum, ið liggja á Statens Serum Institut í Danmark. Talan er um blóðroyndir av nýføðingum, ið eru føddir í Føroyum í tíðarskeiðinum 1986-2002.
Farið verður undir hesar kanningar í seinnu helvt av november 2009, og taka kanningarnar umleið 10 mánaðir. Byrjað verður við teimum yngstu kortunum. Nærri er at frætta um gongdina á www.hmr.fo
Persónar, føddir í Føroyum millum 2003 og februar 2009, eru longu kannaðir fyri CTD, um so er, at foreldrini hava valt eina víðkaða PKU-roynd.
Kanningar av PKU-kortunum hjá nýføðingum er umleið 85% álítandi, tí carnitin-støðið hjá einum nýføðingi kann verða ávirkað av carnitin-innihaldinum hjá mammuni. Les meiri á www.hmr.fo
Svar uppá kanningina
Eins og vanligt er við PKU-kanningum, so fáa bert tey, har okkurt illgrunasamt er, svar. Á www.hmr.fo verður møguligt at fylgja við, nær úrslitini fyriliggja fyri prøvar tiknir ávísar dagar, bæði av nýggjum blóðroyndum av vaksnum og børnum, umframt PKU-kortunum. Hoyrir tú einki, so er orsøkin tann, at eingin illgruni er um sjúku, sigur Heilsumálaráðið.
