Í Suðuroynni hava tíðindi seinastu tíðina gingið um, at Føroya Sparikassi ætlar sær at seta á stovn eina deild í Vági. Hesi tíðindi vil forstjórin í Sparikassanum hvørki avsanna ella vátta, men Sosialurin frættir, at tingingar hava verið millum E. D. Joensen Radiohandil um, at sparikassin skuldi keypa bygningin hjá Radiohandlinum og lata upp avgreiðslu í honum. Eyðun Dahl Joensen, eigari av radiohandilinum, sigur tó við blaðið, at hesar tingingar eru sleptar. Tá stjóraskiftið í Føroya Sparikassa fór fram, hendi nevniliga tað, at áhugin fyri at keypa bygningin knappliga fall, og síðani er einki hent í málinum.
Vísir ikki møguleikanum aftur
Forstjórin í Føroya Sparikassa, Marner Jacobsen, vísir ikki møguleikanum fyri at lata deild upp í Vági aftur. Hann heldur, at sparikassin eins væl kann lata deild upp har, sum nakra aðrastaðni, um grundarlag er fyri hesum.
Tað er klárt, at vit viðgera allar møguleikar fyri at 0víðka um virksemi okkara, men eg vil ikki vátta tíðindini um, at vit ætla okkum at lata eina deild upp í Vági.
Um tit fara at opna eina deild av Føroya Sparikassa í Vági, er hetta so tí at Suðuroyar Sparikassi lat upp við síðuna av tykkum í Havn?
Fyrr var eitt landafrøðiligt býti millum sparikassarnar, men tá Suðuroyar Sparikassi lat upp deild yvirav deildini hjá okkum í miðbýnum í Havn, breyt hann hetta landafrøðiliga býtið, sigur Marner Jacobsen, ið heldur, at orsaka av hesum ger Føroya Sparikassi ikki nakað skeivt, um hann letur upp deild í Vági.
Forstjórin í Føroya Sparikassa ger tó greitt, at um Føroya Sparikassi letur upp í Vági, er talan ikki um nakra hevndaratsókn, men um ein møguleika fyri at víðka um virksemi hjá stovninum.
Høvdu tit latið upp deild í Vági, um Suðuroyar Sparikassi ikki hevði latið upp í Havn?
Nei, eg vil enn einferð vísa á, at tað allatíðina hevur verið eitt landafrøðiligt býti millum sparikassarnar. Tá Føroya Sparikassi lat upp á Tvøroyri, bleiv Suðuroyar Sparikassi spurdur, um hann ætlaði sær at lata deild upp har. Tað ætlaði hann sær ikki, og heldur ikki høvdu teir nakað ímóti, at Føroya Sparikassi í staðin lat deild upp.
Marner Jacobsen vísir á, at tað sum er farið fram millum Føroya Sparikassa og Suðuroyar Sparikassa, altíð er farið fram í sátt og semju. Men tá Suðuroyar Sparikassi lat upp í Havn, bleiv Føroya Sparikassi ikki spurdur. Hann sigur tó, at einki er í vegin við sambandinum millum báðar sparikassarnar.
At enda sigur Marner Jacobsen, at av tí at Suðuroyar Sparikassi ikki spurdi Føroya Sparikassa eftir, tá hann lat upp deild í Havn, heldur hann ikki, at Føroya Sparikassi ger nakað skeivt, um hann letur upp deild í Vági. Men hann leggur dent á, at hann hvørki vil vátta ella avsanna tíðindini um hetta.
