Tann 71 ára gamli John McCain hevur vunnið sær rættin til at stilla upp fyri republikanska flokkin á amerikanska forsetavalinum í novembur. Men tann spurningurin er eisini áhugaverdur, siga amerikanskir fjølmiðlar og vísa á, at aldurin og hansara serstøða í ymsum málum gera, at hann noyðist at finna sær tað rætta evnið til varaforseta. Ja, summir fjølmiðlar halda, at varaforsetavalið hevur ongantíð havt so nógv at siga sum í hesum førinum.
Michael Nelson, professari á Rhodes College, sigur við The New York Times, at McCain hevur trinnar møguleikar. Hann kann velja sær eitt varaforsetaevni úr tí konservativa vonginum í republikanska flokkinum, hann kann velja sær ein úr miðjuni í flokkinum, og í triðja lagi kann hann velja eitt umboð úr einum stati, har hann sjálvur stóð seg illa í uppstillingini.
Fleiri nøvn verða longu nevnd í fjølmiðlunum. Eitt teirra er Tim Pawlenty, guvernørur í Minnesota og sannførdur McCain-maður, og ein annar er konservativi guvernørurin í South Carolina, Mark Sanford. Tað kann eisini hugsast, at McCain fer at velja sær annan av sínum kappingarneytum frá uppstillingini, Mike Huckabee ella Mitt Romney, skrivar The New York Times.
