Meistararnir fara aftur at ferðast

Sunnudagin varð tað í Klaksvík staðfest, at HB er føroyameistari.

Í dag verður fyrsta umfarið, eftir at FM heitið varð plaserað.

Meistararnir skulu norður til Eiðis, har teir í Hólmanum hitta EB/Streym, sum er í djúpum aldudali.

B36 vann seg mikukvøldið við heimasigri í útsetta dystinum ímóti 07 Vestur fram á silvurplássið. Í dag skal B36 spæla í Sarpugerði, har Víkingur skal stríðast fyri lítla møguleikanum, sum liðið framvegis hevur fyri at vinna rættin til næsta summar at spæla í Europa.

Fyri fyrstu ferð í ár er KÍ tríggjar ferðir á rað farið av vøllinum uttan at hava vunnið fulla úrtøku. Seinnapartin fáa klaksvíkingar vitjan av AB, sum eftir tapið á heimavølli ímóti 07 Vestur síðsta sunnudag er aftast.

07 Vestur skal í dag spæla á útivølli ímóti NSÍ, sum kappast við B36 og KÍ – og eitt sindur við Víking – um silvur og bronsukrónurnar.

Skála skal royna seg í Trongisvági, har setningurin hjá heimaliðnum er at taka sætta plássið frá júst Skála.

Forsøgnin sigur frá frískum høgættarloti seinnapartin. Hitin verður millum fimm og átta stig. Tað verður ælaveður, og í løtum fer sólin at síggja.

KÍ – AB: Kári J. á Høvdanum kl. 15.00

EB/Streymur – HB: Jóhan Hendrik Ellefsen kl. 15.00

Víkingur – B36: Dagfinn Forná kl. 15.00

NSÍ – 07 Vestur: Lars Müller kl. 15.00

Suðringar – Skála: Eiler Rasmussen kl. 15.00