22. juni var serligur dagur hjá teimum báðum Pavlovic monnunum í føroyskum fótbólti. Henda dagin hevði TB vitjan av KÍ. Venjari hjá TB er Zoran Pavlovic. Á KÍ liðnum var sonur Zoran, Deni Pavlovic, álit í miðverjuni.
Fyri Zoran Pavlovic og TB var tað kærkomið, at tað eydnaðist at vinna 1-0.
Fyri KÍ var úrslitið stórt vónbrot, og fyri Deni Pavlovic var talan um fótbóltsliga vanlukku. Serbiski miðverjin sá reyða kortið. Sektin var langt leikbann. Tað er ikki fyrr enn í dag, at Deni Pavlovic aftur er tøkur at spæla í landskappingini, og tað verður aftur ímóti TB, har pápin er venjari.
KÍ hevur eina ferð fyrr í ár havt vitjan av TB. Tað var 28. apríl, tá ið KÍ vann 7-0. Hetta er størsti sigur hjá KÍ higartil í ár, og hetta er størsta tapið hjá TB higartil í ár.
Hjá TB er Ragnar Tausen burturstaddur, og Regin í Lágabø er skaddur í knænum. Ken Fagerberg er darvaður av skaða í knænum, og tí er ivasamt, um hann verður førur fyri at spæla ídag. Álopsspælarin Ivan Ivanovic er tøkur aftur, eftir at hann hevur verið darvaður av fótskaða.
Síðani summarsteðgin hevur tað verið upp og niður á heimavølli hjá KÍ: 2-0 sigur ímóti Víkingi, 2-2 ímóti Skála og 0-2 ímóti B36. Tvær tær seinastu ferðirnar hevur KÍ vunnið 1-0 á Eiði og 3-1 á heimavølli ímóti HB. Ikki minst seinasti sigurin hevur lyft fótbóltslagið har norðuri.
Málverjin Meinhardt P. Joensen og Óli Eyðsteinsson Poulsen eru framvegis skaddir.
