Síðstu árini hava verið fleiri tilburðir, har óvandalig handfaring av vápnum hava sett lív hjá fólkum í váða. Tað hevur fest í eitt afturvendandi kjak um, hvussu lætt tað er at ogna sær vandamikil vápn.
Higartil hevur borið einum og hvørjum, sum er fyltur 18 ár, til at fara í ein handil at keypa sær vápn. Nýggja vápnalógin, sum helst verður løgd fyri løgtingið í komandi tingsetu, hevur við sær, at fútin í hvørjum einstøkum føri skal loyva tær at keypa, innflyta ella eiga vápn. Talan er fyrst og fremst um skotvápn og pípur, sum kunnu skjóta út kúlur, høgl ella onnur projektil, t.v.s. riflur, skammbyrsur og høglbyrsur, men eisini onnur skotvápn eru umfatað. Tað verður eisini ólógligt uttan loyvi at keypa sær lóður til hesi vápn. Í nýggju lógini er revsingin fyri brot á vápnalógina eisini herd.
Tað er greitt, at føroyingar hava havt tætt tilknýti til vápn, tí nógv veiða fugl og harur. Men løgmálaráðið heldur, at nú føroyingar eru førkaðir longur frá veiðisamfelagnum, eru vápn alsamt meiri knýtt at harðskapi og minni til at matskaffa. Spurningurin er, um øll eru samd, men tey ósamdu sleppa eisini at gera vart við seg. Uppskotið er sent til hoyringar hjá ymiskum viðkomandi pørtum, men øll eru vælkomin at senda viðmerkingar, verður sagt av løgmálaráðnum.
Nógv herd vápnalóg á veg
