Í dag undirskrivaði ísraelski forsætisráðharrin, Benjamin Netanyahu, eina avtalu, sum loyvir einari munandi víðkan av ísraelsku búsetingunum á Vestara Áarbakka.
- Hetta er á hertiknum landaøki, nærindis Jerusalem, veit tíðindastovan Reuters at siga í kvøld.
Henda ætlan hjá ísraelsku stjórnini er umstrídd, eitt nú, tí hon byrgir av Vestara Áarbakka frá eystara parti av Jerusalem.
ST sigur, at ísraelsku búsetingarnar á Vestara Áarbakka eru ólógligar og brot á fólkarættin, og ST sigur eisini, at hetta er ólóglig hertøka av landaøki.
- Tað verður eingin palestinskur statur, sigur ísraelski forsætisráðharrin, Benjamin Netanyahu, í dag sambært Reuters.
Kríggið í Gazageiranum heldur fram, og í dag hevur ísraelski herurin sent út flogseðlar í Gazabýi, har íbúgvar fáa boð um at fara úr býnum.
Reuters veit eisini at siga, at fleiri hundrað túsund palestinar, sum eru flýddir úr øðrum pørtum av Gazageiranum, eru í Gazabýi.
Ísraelski herurin hevur lagt fleiri stórar bygningar í býnum í oyði, og alt bendir á, at herurin ætlar at halda fram við hesum - í royndini at berja niður Hamas.
