Fiskivinna
Snellubáturin Norðsøki, sum er heimahoyrandi á Selatrað, er komin aftur av sínum fyrsta túri undan Íslandi.
Á Kósabrúnni í Klaksvík søgdu landarar í morgun, at Norðsøki er fyrsti føroyski snellubáturin, sum higartil í ár hevur verið undir Íslandi.
Góð veiða
Norðsøki landaði í Klaksvík í morgun, og haðani siga tey, at veiðan liggur um 70.000 pund, sum er ein rímiliga góður túrur.
Skipið hevur onkuntíð havt 90.000 pund á einum túri, men tá hava teir eisini havt fisk á dekkinum, skilst.
Meginparturin av veiðini hjá Norðsøka er upsi, men teir hava eisini eini 2.000 pund av góðum kongafiski og nakað av toski.
