Tað er valla heldur av ongum, at ein stór fyritøka, sum tann hjá Jákupi á Dul Jacobsen headhuntar sjálvan fíggjarmálaráðharran - og við tí øllum tí góða »brandinum«, sum er kring hann - at standa fyri stóru verkætlanini við Stórutjørn.
Spurningurin er, um hetta er ein nýggjur trendur, sum kemur higar til lands, at ungir evnaríkir politikarar leggja frá sær fyri at taka við avbjóðingum í vinnulívinum. Vit kenna hetta aðrastaðni frá, eitt nú Henning Dyremose í Danmark, sum var fíggjarmálaráðharri - og sum seinni varð headhuntaður sum stjóri fyri Tele Danmark - núverandi TDC.
Tað kann sjálvandi vera gott, at politiska skipanin rekruterar vinnulívsleiðarar, men so kunnu vit eisini seta spurnigin, um landsstýrismannalønin er ov lág.
Stóri spurningurin er, hvør verður nýggur landsstýrismaður fyri Sambandsflokkin. Mest upplagdi kandidaturin er uttan iva formaðurin sjálvur, Kaj Leo Johannesen. Sum fíggjarmálaráðharri síðstu mánaðirnar fram til valið fær hann profilerað seg - og hinvegin kann tað ikki ganga heilt galið, tí hann fær tikið sær æruna av øllum tí góða og víst øll tí óhepna frá sær.
Nógv í tingmanning floksins kunnu útilokast: Johan Dahl varð frákoyrdur í hesum valsekiðinum. Alfred Olsen hevur avskrivað seg sjálvan, tí hann er farin úr samgonguni. Edmund Joensen er tingformaður, Lisbeth Petersen er á veg út. Tí er Kaj Leo Johannesen tann mest upplagdi, um tað skal verða ein av teimum fólkavaldu.
Men ein stórur trupulleiki er kortini, at um Kaj Leo Johannesen fer í landssstýrið, so stendur løgtingssessurin opin fyri Heðini Mortensen, ið sum kunnugt ikki er sambandsmaður longur. Hendir tað, so fer Heðin Mortensen upp í tingbólkin hjá Javnaðarflokkinum.
Fyri Sambandsflokkin er timingin hjá Bárði Nielsen undir øllm umstøðum sera óheppin. Flokkurin missir størsta aktivið og við so stuttum skotbráð fær flokkurin ikki sett nýtt fólk við.
