Fleiri føroyskar fyritøkur luttaka á stóru oljumessuni.
Stóra oljumessan í Stavanger, Offshore Northern Seas, stytt ONS, byrjar í morgin, týsdagin 28. august. Sum vanligt eru fleiri føroyskar fyritøkur við á messuni.
Uttanríkistænastan hevur saman við Oljuvinnufelagnum samskipað føroyska landabásin, og ikki minni enn 13 fyritøkur umframt Oljuvinnufelagið, Uttanríkistænastan, Vinnumálaráðið og Jarðfeingi luttaka. Eisini vitja Johan Dahl, landsstýrismaður í oljumálum, og løgmaður, Kaj Leo Johannesen, føroyska básin.
Umframt básin á sjálvari messuni eru føroysku fyritøkurnar partur av móttøku, sum verður umborð á Westward Ho mikudagin 30. august. Móttøkan verður samskipað av Tórshavnar Kommunu saman við Runavíkar Kommunu, har móttøkuluttakararnir fáa brellbitar av føroyskum tónleiki, mentan og mati.
Føroysku fyritøkurnar, sum eru við á ONS í ár, eru Atlantic Supply Base, Pam Offshore, Runavíkar Havn, Thor, Atlantic Airways, Tórshavnar Havn, Vónin, Statoil, Atlantic Petroleum, Shefa, Vágs Havn, Tvøroyrar Havn og Supply Service.
