Manchester United vann í gjár 3-1 í Liverpool móti Everton. Eftir dystin vísti Ole Gunnar Solskjær, venjari hjá Manchester United, stóra ónøgd við kappingarnevndina, sum setti Manchester United at spæla leygardag á døgurð, eftir at liðið spældi í Turkalandi í Champions League mikukvøldið.
- Hetta var gjørt til at miseydnast fyri okkum. Hvussu kann tað verða so, tá vit hava so nógvar dystir. Luke Shaw og Marcus Rashford blíva skaddir av hesum í dag. Lat okkum hugsa um spælararnar og lat okkum spæla sunnudag, tá vit hava so nógvar dystir, sigur Ole Gunnar Solskjær.
Manchester United var aftanfyri 1-0, men endaði við at vinna 3-1 við tveimum málum frá Bruno Fernandes og einum frá Edinson Cavani, ið skoraði sítt fyrsta mál fyri nýggja felagið hjá sær.
Fríggjakvøldið vann Southampton 2-0 á Newcastle og legði seg fyribils á odda í Premier League. Í skemti skrivaði felagið á Twitter, at nú er tíðin komin at steðga uppteljingini – eins og Donald Trump ynskti fyri valið í USA – so Southampton endar nummar eitt.
Crystal Palace vann 4-1 á Leeds, meðan Chelsea vann við somu siffrum á Sheffield United. West Ham vann 1-0 á Fulham. Stóra søgan í dystinum var, at Fulham brendi brotsspark móti endanum, tá Ademola Lookman miseydnaðist við at gera ein “Panenka”, sum er alt lyfta bóltin mitt í málið við tí vón, at málverjin hevur tveitt seg.
Stóri dysturin í dag er klokkan 16.30, tá Manchester City fær vitjan av Liverpool.
| 1 | Southampton | 8 | 5 | 1 | 2 | 16:12 | 16 |
| 2 | Liverpool | 7 | 5 | 1 | 1 | 17:15 | 16 |
| 3 | Chelsea | 8 | 4 | 3 | 1 | 20:10 | 15 |
| 4 | Leicester | 7 | 5 | 0 | 2 | 17:9 | 15 |
| 5 | Tottenham | 7 | 4 | 2 | 1 | 18:9 | 14 |
| 6 | Everton | 8 | 4 | 1 | 3 | 16:14 | 13 |
| 7 | Crystal Palace | 8 | 4 | 1 | 3 | 12:12 | 13 |
| 8 | Wolves | 7 | 4 | 1 | 2 | 8:8 | 13 |
| 9 | Aston Villa | 6 | 4 | 0 | 2 | 15:9 | 12 |
| 10 | Arsenal | 7 | 4 | 0 | 3 | 9:7 | 12 |
| 11 | West Ham | 8 | 3 | 2 | 3 | 14:10 | 11 |
| 12 | Man City | 6 | 3 | 2 | 1 | 9:8 | 11 |
| 13 | Newcastle | 8 | 3 | 2 | 3 | 10:13 | 11 |
| 14 | Man Utd | 7 | 3 | 1 | 3 | 12:14 | 10 |
| 15 | Leeds | 8 | 3 | 1 | 4 | 14:17 | 10 |
| 16 | Brighton | 8 | 1 | 3 | 4 | 11:14 | 6 |
| 17 | Fulham | 8 | 1 | 1 | 6 | 7:15 | 4 |
| 18 | WBA | 7 | 0 | 3 | 4 | 6:16 | 3 |
| 19 | Burnley | 7 | 0 | 2 | 5 | 3:12 | 2 |
| 20 | Sheffield Utd | 8 | 0 | 1 | 7 | 4:14 | 1 |
