Pauli Mittún og Helgi H. Hoydal spældu teirra higartil størsta dyst síðani teir skiftu til Kristiansand í bestu norsku hondbóltsdeildini.
Í dag spældi Kristiansand hálvfinalu í steypakappingini móti suverena oddaliðnum í bestu norsku hondbóltsdeildini, Kolstad.
Tað eydnaðist leingi Kristiansand at geva Kolstad ein skarpan gang. Í steðginum var støðan javnleikur 15-15, og liðini fylgdust fyrstu løtuna av seinna hálvleiki. Men so dróg Kolstad frá Kristiansand, og endan var, at Kolstad vann dystin 34-25.
Sostatt er steypaævintýrið hjá Kristiansand liðugt á hesum sinni.
Pauli skoraði trý mál og legði upp til trý mál í dag. Helgi kom ikki á máltalvuna í dag.
Kolstad møtir í morgin Elverum í steypafinaluni.
