Tíðindaskriv:
Seinasta freist at tekna seg til Føroya vakrasta hálvmaraton – og at gera møguligar broytingar ella navnabroytingar – er sunnudagin 31. august. Longu nú hava 453 rennarar og 318 gangarar teknað seg, og tað merkir, at heili 771 luttakarar úr 13 ymiskum londum longu hava váttað sína luttøku.
Føroya vakrasta hálvmaraton verður leygardagin 6. september. Tiltakið savnar rennarar og gongufólk úr Føroyum og útheiminum.
Hetta er bæði ein ítróttaligur og mentanarligur veitsludagur, har luttakararnir eru alt frá royndum rennarum og gongufólki - til arbeiðspláss, vinabólkar og familjur. Rutan er úr Gásadali til Sandavágs kirkju og fer gjøgnum allar bygdirnar í Vágum – ein einastandandi vøkur ruta við nógvum tónleiki á vegnum.
Serliga sterk er løtan, tá komið verður um málstrikuna við kirkjuna í Sandavági, har fløggini úr øllum luttakandi londunum veittra
Tiltakið hevur eisini ein týðandi sosialan leiklut. Ein partur av luttøkugjaldinum hjá gongufólki fer til Krabbameinsfelagið. Rennarar hava høvi at lata stuðul, og felagið Berin, sum arbeiðir við sorgarbólkum fyri børn, fær fastan stuðul.
Ítróttarfelagið Frælsi – Felagið fyri frælsan ítrótt í Vágum, skipar fyri Føroya vakrasta hálvmaratoni – við dyggum stuðli frá kommununum, bjargingarfelagnum og vinnulívinum í økinum. Ein ørgrynna av sjálvbodnum tryggja, at tað yvirhøvur letur seg gera.
Í sambandi við tiltakið hevur Landsverk avgjørt at stongja Gásadalstunnilin frá kl. 09.45 til kl. 11.30 og Vatnavegin frá kl. 11.30 til kl. 13.00. Frá kl. 13.00 til kl. 14.00 verður konvoy koyring, sum Vága bjargingarfelag skipar.
Umleið 800 luttakarar vera á vegnum úr Gásadali til Sandavágs, og heita vit á øll um at koyra við varsemi og við atliti til tey mongu, sum ganga og renna hendan vakra túrin.
Ger sum hini 771, sum longu hava teknað seg – tekna teg áðrenn freistina 31. august her: https://fraelsi.fo/fvhm/
