Seta sjøtul á annan triðingin

Seinnapartin verður farið undir annan triðing av landskappingini í fótbólti. Níggju umfør eru avgreidd, og harvið hava øll liðini spælt einaferð ímóti hvørjum øðrum.

Í dag hittast tey, sum dystaðust innanhýsis í øðrum umfari. Í fýra dystum eru tey á útivølli, sum fyrru ferðina áttu heimavøll, og í einum føri eigur sama liðið heimavøll, sum eisini var á heimavølli seytjanda mars.

Suðringar vóru í Sørvági í øðrum umfari, og Suðringar eru aftur í dag á veg til Sørvágs.

Hetta umfarið er serligt á tann hátt, at í tveimum førum hittast somu liðini, sum fyri trimum døgum síðani – Kristi himmalferðardag – dystaðust í fjórðingsfinaluni í kappingini um løgmanssteypið.

Mikukvøldið spældu AB og EB/Streymur á Argjum. Tey hittast aftur á sama vølli ídag.

Hósdagin spældu B36 og Skála í Gundadali. Tey hittast aftur á sama vølli ídag.

Felags fyri KÍ og NSÍ, sum hittast í Klaksvík í dag, er, at tey ikki luttóku í fjórðingsfinalunum, tí tey taptu í fyrsta umfari í steypakappingini.

Í høvuðsstaðnum er avrátt millum feløgini, at tey ikki spæla um somu tíð, tá ið tvey teirra eiga heimavøll. Tí verður fyrsta bríksl í Gundadali ikki fyrrenn klokkan 17.15.

KÍ – NSÍ: Alex Troleis kl. 15.00

Víkingur – HB: Lars Müller kl. 15.00

B36 – Skála: Jóhan Hendrik Ellefsen kl. 17.15

AB – EB/Streymur: Kári J. á Høvdanum kl. 15.00

07 Vestur – Suðringar: Dagfinn Forná kl. 15.00

Støðan undan 10. umfari