Frá mánadegnum 30. august til mikudagin 8. september 2010 verður møguleiki at uppliva tveir tíma longu sýningina hjá Cirkus Baldoni, sum er fyri alla familjuna. Sýningarnar verða í høllum ymsastaðni í Føroyum.
Í tíðindaskrivi siga Cirkus Baldoni, at har er alt frá gyklarum við keylum til flúgvandi tallerkar á pinnum og rulluskoytuframsýning í heimsklassa.
Eisini eru klovnarnir Danilo og Danila ordiliga í hopla, eins og Mr. Hokus og Miss Fokus framføra síni gandakynstur, umframt at cowboy og indianarar hava sín leiklut á framsýningunum.
Talan er um eitt sirkus við góðum stemningi og tónleiki. Meðan framførslurnar eru, kunnu áskoðararnir hugna sær við slikkipinnum, candyfloss og øðrum góðum.
Framsýningarnar verða í Vestmanna, á Giljanesi, í Klaksvík, Runavík, Fuglafirði, Trongisvági, Tórshavn, Skopun, Eiði og í Hvannasundi.
Billettir kunnu keypast ella bíleggjast á: www.cirkusbaldoni.com ella í forhøllini ein tíma áðrenn hvørja sýning. Til 5. september kunnu billettir keypast á Kunningarstovuni í Havn. Frá 1. til 8. september kunnu billettir eisini keypast á Kunningarstovuni í Klaksvík.
