19. umfarið gjørdist dýrt fyri NSÍ, sum nógvu tær seinastu vikurnar hevur verið oddalið í Formula deildini. NSÍ átti heimadyst ímóti Skála, og fyri fyrstu ferð nakrantíð eydnaðist tað Skála at fara úr Runavík við øllum stigunum. Skála vann 2-1, og harvið hevur Skála tryggjað sær fimta plássið - í hvussu so er fram til komandi sunnudag..
Tað tók sína tíð hjá B36, men í 2. hálvleiki skoraði Sylla tvær ferðir, og so hevði B36 vunnið 2-0 á heimavølli ímóti VB/Sumba.
Harvið er B36 nýtt oddalið, og harvið er VB/Sumba niðanfyri strikuna. Tað eru ellivu stig fram til 8. plássið.
Saman við VB/Sumba er AB undir strikuni. Hóast AB megnaði 2-2 ímóti steypavinnarunum EB/Streymi, sum serliga í 1. hálvleiki ikki tók uppgávuna í sama álvara sum gestirnir, so er AB við ellivu stigum ellivu stig frá bjargingini.
Stóra lopið hesa ferð gjørdi KÍ. Klaksvíkingar vunnu 3-1 á heimavølli ímóti B71, sum síðstu løtuna bara hevði níggju spælarar á vøllinum. Sigurin bar við sær, at KÍ fór framum bæði B71 og GÍ og nú er á 6. plássi.
GÍ hevur møguleika at taka sætta plássið aftur, tá ið gøtumenn mánakvøldið fara í Gundadal at spæla ímóti HB, sum við sigri á GÍ kann taka seg eitt stig nærri toppinum, enn HB var undan 19. umfari.
Við sigri á GÍ fer HB at taka seg fram á triðja plássið. Tá fara teir at hava sama stigatal sum EB/Streymur, men HB hevur vunnið báðar innanhýsis uppgerðirnar og verður harvið fremri enn EB/Streymur.
Úrslit í 19. umfari:
B36-VB/Sumba 2-0 (0-0)
KÍ-B71 3-1 (0-0)
NSÍ-Skála 1-2 (0-1)
EB/Streymur-AB 2-2 (1-2)
HB-GÍ mánakvøldið 20. august kl. 18
Støðan
B36 43 stig
NSÍ 41 stig
EB/Streymur 33 stig
HB 30 stig
Skála 26 stig
KÍ 24 stig
GÍ 23 stig
B71 22 stig
VB/Sumba 11 stig
AB 11 stig
20. umfar sunnudagin 26. august
B36-KÍ
GÍ-EB/Streymur
Skála-HB
B71-NSÍ
VB/Sumba-AB
