Tað var tann nýstovnaði arbeiðaraflokkurin í Føroyum, Føroya Javnaðarflokkur, sum stovnaði Sosialin, sum tá æt »Føroya Social-Demokrat«. Manna millum varð blaðið bara kallað »Sosialurin«, og tí valdu tey 2. apríl í 1955 at broyta navnið tilsvarandi, og síðani hevur blaðið itið »Sosialurin«.
Tá blaðið flutti í nýggju blaðhúsini á Argjum í 1982 varð roynt at gera blaðið meira til eitt tíðindablað heldur enn eitt politiskt blað. Tá fekk navnið forskoytið »Tíðindablaðið Sosialurin«. Men í oktober í 2000 varð farið aftur til navnið »Sosialurin«.
Talið av bløðum í Føroyum fylgdi talinum av politiskum flokkum. Áðrenn Javnaðarflokkurin vóru tveir flokkar á tingi, Sambandsflokkurin og Sjálvstýrisflokkurin. Teir høvdu hvør sítt blað, Dimmalætting og Tingakross, sum virkaðu sum teirra málgøgn.
Skuldi ein flokkur vinna sæti á tingi, so var neyðugt við einum blað. Tí varð Sosialurin settur á stovn.
Næstu flokkarnir eru Fólkaflokkurin (Vinnuflokkurin) í 1936 og Tjóðveldi í 1950ø Teir stovna eisini síni egnu bløð, Dagblaðið, sum kom í 1935, og 14. September, sum kom á fyrsta sinni í 1947.
Bløðini eru øll hesi árini politiskt heft at sínum flokki, og tað sæst aftur í skrivingini. Tað er ikki fyrr enn útvarpið kemur í 1957, at føroyingar fáa tíðindi, sum eru óheft av politiskum áhugamálum. Gamaní hava verið onnur bløð eisini, sum ikki hava havt tilknýti til politisku flokkarnar. Men floksbløðini vóru bulurin í føroyska fjølmiðlaheiminum – áðrenn Útvarpið .
Politisku flokkarnir sótu framvegis á bløðunum heilt fram til aldarskiftið. Í sjeytárunum royndi Sosialurin at flyta seg til at vera eitt tíðindablað. Politiska tilknýtið var tó eyðsýnt. Men sum tíðin leið gjørdist floksbandið strævið – bæði fyri Javnaðarflokkin sum eigara og fyri óheftni hjá blaðnum. Dimmalætting loysti seg eisini spakuliga frá Sambandsflokkinum, men Dagblaðið og 14. September fóru bæði á húsagang, eins og Tingakrossur.
Í 2006 seldi Javnaðarflokkurin blaðið til P/F Miðlafelagið, sum leiðsla og starvsfólk á Sosialinum høvdu stovnað til endamálið.
