Kári Johansen, sum er føddur hin 27. september í 1971, er sonur navnframa fakfelagsmannin, Karl Johansen, sum var formaður í Havnar Arbeiðsmannafelag í eina fjórðingsøld. Á kommunuvalinum hin 10. november í fjør varð Kári Johansen valdur í Tórshavnar býráð fyri Javnaðarflokkin.
Tá býráðið skipaði seg og mannaði nevndir, gjørdist 50 ára gamli, Kári Johansen, ið starvast sum spreingimeistari hjá J&K Petersen, formaður í havnanevndini, umframt at hann eisini er limur í øðrum nevndum í býráðnum.
Í nøkur ár hevur havnanevndin í kommununi líka sum ligið undir vinnunevndini, sum eisini hevur tikið sær av ymiskum øðrum. Men, nú er so havnanevndin aftur skipað sum serstøk nevnd í býráðnum, sum í fyrsta lagi kemur at taka sær av tí, sum hevur við havnaløgini í høvuðsstaðarkommununi at gera.
Nývaldi býráðslimurin er fullgreiður yvir, at tað er ein stór uppgáva, hann hevur átikið sær sum havnanevndarformaður í landsins størstu kommunu. - Mín uppgáva sum formaður verður at slóða fyri, at vit í Tórshavnar kommunu hava góð og vælskipað havnaløg - tað veri seg til bæði farmaskip, ferðafólkaskip, fiskiskip, ferjur og bátar.
Hann sigur, at sama er við havnaøkjunum, sum skulu skipast, soleiðis at tey tæna teimum, sum brúka tey sum best.
Kári Johansen sigur, at økið við nýggju Skansabryggjuna skal skipast, og havnalagið á Oyrareingjum skal aftur koma til gagns, nú Samskip flutti inn til Runavíkar. Í løtuni verður nýggjur bátahylur bygdur í Álakeri, sum vónandi kemur at nøkta bráðfeingistørvin hjá bátaeigarum í høvuðsstaðarøkinum.
- Vit hava eisini nøkur nýggj vinnuøki, eitt nú á Sundi, sum er bygt við tunnilsgróti, og vit vóna, at okkurt kann spyrjast burtur úr, sum tíðin gongur. Vinnulívið skal trívast í høvuðsstaðnum, bæði stórvinna og smávinna, og eg fegnist stórliga um tað virksemi, sum útróður, landingarmiðstøð og skipasmiðjan Mest eisini skapa í økinum.
Kári Johansen leggur aftrat, at hansara uppgáva sum havnanevndarformaður eisini verður at gera høvuðsstaðin enn meira attraktivan hjá bæði farma-og ferðamannaskipum og atknýttum fyritøkum á landi.
