- Allur Gazabýur er eitt krígsøki.
Tað sigur ísraelski herurin, sum steðgar øllum neyðhjálparflutningi til býin, sum er hin størsti í Gazageiranum.
Tíðindastovan NTB veit at siga, at fleiri hundrað túsund palestinar eru í Gazabýi, har ST hevur lýst hungursneyð.
Tískil kann steðgurin í neyðhjálparflutningunum til býin fáa ógvuligar avleiðingar.
ST og ein røð av londum hava mótmælt avgerðini hjá ísraelsku stjórnini at taka Gazaby við hermegi.
Samstundis, sum Ísrael ætlar at taka býin, hevur verið heitt á palestinar um at rýma suðureftir í Gazageiranum.
