Tá bygdaráðið í Nes kommunu viðgjørdi fíggjarætlanina fyri 2014, vóru tað tríggir bygdaráðslimir, sum mæltu til at hækka skattaprosentið við einum prosenti - úr 20,5 upp í 21,5 prosent.
Teir, sum vildu hækka skattin hjá borgarunum í kommununi við einum prosenti, vóru Mortan Højgaard, Jákup Olsen og Niclas Davidsen, sum allir eru nývaldir í bygdaráðið.
- Vit høvdu ein arbeiðsfund við Gjógv og soleiðis, sum vit skiltu meiningarnar tá, vóru fleiri enn vit tríggir samd um, at neyðugt er at hækka skattin við einum prosenti.
Tað sigur Mortan Højgaard, sum at enda var hin einasti bygdaráðslimurin í Nes kommunu, sum atkvøddi blankt, tá tað vísti seg, at skattaprosentið fór at vera óbroytt, 20,5.
Tað vóru annars teir tríggir, Mortan, Jákup og Niclas, sum høvdu uppskot um at hækka skattin við hesum eina prosentinum.
Nærkast loftinum
Mortan Højgaard vísir á, at skuldin hjá Nes kommunu nú nærkast loftinum, sum er ein álíkning, og tí heldur hann, at rættast hevði verið at lagt eitt prosent oman yvir skattin aftrat - fyri at goldið niður skuld.
- Vit hava íløgur, sum liggja á láni. Atløgusíða er bygd við nýggju saltgoymsluna, men enn er eftir at asfaltera økið.
Bygdaráðslimurin vísir á, at spillivatnsætlanin, sum skal fullførast, krevur eisini nógv, og í nýggja barnagarðinum á Svangaskarði er einki gjørt í kjallarahæddini.
- Samstundis, sum vit soleiðis hava arbeiðir, ið liggja á láni, nærkast vit loftinum, og tí hildu vit, at rættast hevði verið at lagt eitt prosent oman yvir skattin aftrat.
Mortan Højgaard heldur, at besta íløgan, sum ein kommuna kann gera, er at gjalda niður skuld.
- Eg haldi tað vera ábyrgdarleyst av meirilutanum ikki at vilja leggja hetta eina prosentið oman á skattin, sigur bygdaráðslimurin.
