Tað var Ásgerð Thomsen í Havn, sum í Gekka-spælinum í kvøld fekk fulla plátu og slapp at snara hjólinum um høvuðsvinningin á 1,5 miljónir krónur. Hon ivaðist onga løtu og valdi at koyra allan høvuðsvinningin í bláa leypin.
Tað mátti røkka ella støkka!
- Eg havi spælt við øll árini, og hetta er fyrstu ferð, eg havi fingið fulla plátu, segði hon, áðrenn leikur byrjaði.
Í fyrsta drátti steðgaði hjólið á 10.000 krónum, sum faldað við fimm hevði givið Ásgerð Thomsen 50.000 krónur. Men, hon ivaðist slett ikki. - Vit spæla víðari, var greiða svarið, tá hjólið steðgaði.
Í øðrum drátti steðgaði hjólið á 15.000 krónum, sum faldað við trý hevði givið henni 45.000 krónur. Men, heldur ikki hesaferð var nakar ivi. - Nei, vit prøva einaferð aftrat, segði hon.
Í triðju og seinastu royndini steðgaði hjólið aftur á 15.000 krónum, sum gjørdist vinningurin hjá Ásgerð Thomsen í kvøld. - Tú valdi at "gambla" ordiliga, segði verturin, Jensina Olsen.
- Ja, tað geri eg altíð, segði ein slett ikki vónsvikin Ásgerð Thomsen, sum í Gekka-spælinum í kvøld slapp at royna eydnuna fult út. Hon tók hetta sum eitt upplivilsi, har tað antin mátti bera - ella bresta.
Men, 15.000 skattafríar krónur var havnarkonan so vorðin ríkari, tá hon legði hornið á og takkaði fyri spennandi løtuna og upplivilsið í Gekka-spælinum í kvøld.
##med2##
