Samkoman City Church hevur í fleiri ár havt eitt sum kallast City Meal, har tey geva máltíðir.
Ein dagin í hesi vikuni góðu tey aftur 150 máltíðir til fólk, sum ynsktu sær ein góðan bita.
Tá In.fo kom framvið stutt fyri klokkan 17 ein seinnapart í vikuni, stóð Lív Jacobsen úti á gongubreytini og bjóðaði fólki, sum komu framvið, døgurða.
- Tú skundar tær so - hevur tú ringa tíð? spurdi hon vinaliga og sera blídliga.
- Ja, eg skal náa bussin, so eg noyðist at fara yvir í Steinatún.
Lív segði, at tey høvdu tilgjørt 150 máltíðir, sum tey vilja veita fólki, sum koma framvið, og eisini vit vóru vælkomin, um tíðin hevði rokkið til.
Í Steinatúni plaga fólk at savnast, og ætlanin var at siga frá um døgurðan hjá City Church, men júst hesa løtu var eingin í Steinatúni.
- Vit lata fólki døguðan heim við. Døgurðin er í eskju og termoposa. Gleðin at geva máltíðir er eitt dna, sum samkoman hevur.
##med2##
Lív Jacobsen heldur fyri, at tað er einki, sum kann steðga City Church í at geva máltíðir út og vælsigna fólk, sum tey møta á leiðini.
Nú gleða tey í City Church seg til, at loyvini frá Tórshavnar kommunu skjótt verða klár.
Samkoman ætlar nevniliga at byggja ein nýggjan bygning eftir herviliga eldin, sum oyðilegði góðu karmarnar, ið samkoman hevði.
