Bjarki Danielsen hevur bríkslað fyri síðstu ferð í góðveðrinum í Gundadali í kvøld. Talvan sigur, at B36 vann 3-0 ímóti TB, og tá ið málmunurin er so stórur, so er talan um tryggan sigur.
Málini telja, og sjálvandi eru teir í B36 fegnir, og teir í TB eru vónbrotnir.
Men gongdin stóran part av tíðini var soleiðis, at um TB megnar at samanspæla nýggja liðið uppaftur betur, so verður tað ikki so leingi, inntil fyrsti sigurin á árinum verður veruleiki.
Væl upplagdi Hannes Agnarsson legði heimaliðið á odda, tá ið eitt stórt korter var farið. Mathias Thrane, sum var sentralur miðvallari saman við Magnus Holm Jacobsen, átti uppleggið.
So vísti TB í ein tíma, at liðið er væl betri fyri nú, enn tað hevur verið higartil í ár.
Tað var smeitur, tá ið Ndende í seinna hálvleiki noyddist skaddur av vøllinum, og kanska var tað ein partur av orsøkini til, at B36 fram ímóti dystarenda skoraði tvey mál aftrat. Tað fyrra skoraði vongverjin í høgru Benjamin Heinesen við dundurskoti av brotsteigarmarkinum og upp í málhornið.
Tað seinna skoraði Ragnar Samuelsen. Hann varð skiftur inn í seinna hálvleiki. Uppleggið átti Bjarki C. Nielsen, sum eisini varð skiftur inn í seinna hálvleiki.
Toni Takamaki vísti seg at rigga væl í TB miðverjuni saman Aron Sørensen og Ndende, og Filip Djordjevic og Kaspar Svarups eru góðir at hava fingið sum styrk í framrættaða partinum.
Hjá B36 sást lítið til Uros Stojanov, sum heimamenninir høvdu ilt við at spæla leysan soleiðis, sum hann eigur, og Hákun Edmundsson kom ikki á vøllin.
Trivaligi 3-0 sigurin ber við sær, at B36 hevur 27 stig og er á fjórða plássi. NSÍ hevur eisini 27 stig, men málmunurin hjá B36 er betri, og B36 hevur spælt ein dyst færri enn NSÍ.
TB er framvegis aftast við tveimum stigum.
B36 – TB 3-0 (1-0)
1-0: Hannes Agnarsson 18.
2-0: Benjamin Heinesen 86.
3-0: Ragnar Samuelsen 88.
Dómari: Bjarki Danielsen
B36: Mathias Lamhauge – Benjamin Heinesen, Andrias H. Eriksen, Lukas S. Enevoldsen, Martin Agnarsson (Alex Mellemgaard, 17.) – Andrass Johansen (Ragnar Samuelsen, 78.), Magnus Holm Jacobsen, Mathias Thrane, Hannes Agnarsson (Bjarki C. Nielsen, 70.) – Sebastian Pingel, Uros Stojanov
TB: Nikola Stoisavljevic – Aron Sørensen, Ndende Adama Guéye (Nikolei Johannesen, 65.), Toni Takamaki – Moro Ibrahim, Dánjal Godtfred, John Villi Wøldike Leo, Jens Erik Bruhn – Filip Djordjevic, Kaspar Svarups, Samudeen Musah (Jóhan Renéson Thomsen, 83.)
