Tekniskir trupulleikar í samgonguni

Eg sá smílibondini hjá Tobba fyri mær, tá ið ein tíð­ind­a­sending fyri og onnur eftir, alla stilluviku á tamb, tóku fyrispurningin upp, sum snúði seg um m.a. at flyta Tekn­iska skúla úr Havn til Klaksvíkar

Tað vóru ikki bara fjøl­miðlarnar, sum fóru uppfrá, men so sanniliga eisini fleiri av politikarum okkara, bæði úr løgtingi og landsstýrið. Enntá landsstýrismaðurin í Almanna og Heilsumálum valdi at seta tíð av til at svara fyrispurninginum, sum ann­ars var settur til Jógvan á Lakjuni.
Nú veit eg ikki hvat í norð­oy­a­tin­g­menninir siga til alla hesa uppmerksomheit, sum fyrispurningurin hjá Tobba fær, men í mínari verð var hasin parturin av fyrispurninginum, sum snúði seg um at flyta Tekniska skúla í Havn til Klaksvíkar, eitt ekkó av tí, sum eg havi hoyrt óteljandi ferðir áður. Og eg haldi ikki, at eg fari skeiv, um eg haldi meg hava hoyrt norðoyatingmenninar sagt nakað tað sama um Tekn­iska skúla, sum Tobbi sigur. Men uttan at fjølmiðlarnir yvirhøvur hava varnast tað.
So onkursvegna megnar Tobbi at tosa við eini rødd, sum hoyrist.
Og her kemur undirritaða so eisini við inn á banan, sum annars ikki tók tann part­in, sum snúði seg um at flyta tekniska skúla í Havn til Klaksvíkar í álvara. Av tí einføldu orsøk at eg veit, at Tekniski skúlin í Havn verð­ur ikki fluttur. Eg tori at leggja høvdið á blokkin fyri, at ongin løgtingslimur, kemur at atkvøða ímóti tí uppskotinum, sum er í nevnd, og sum snýr seg um at játta pengar til at fíggja bygginh av einum nýggjum Tekniskum skúla í Havn.
Alt annað vildi eisini verið óð­a­mannaverk. Havi sjálv ar­beitt á Tekniska skúla í Havn í trý ár. Og hóast sera ótolandi hølisumstøður, so er ongin ivi um, at næm­ing­ar, lærlingar og hand­verk­ar­a­vinnan ynskja at skúl­in skal verða í Havn. Skúl­in hevur ment sína ment­an og umhvørvi her í høvuðsstaðnum, og tað er tí ikki nakað, sum tú kanst avritað niður í eitt annað øki.
Eitt er at rokna tøl út á einum excellarkið. Men hesi tøl siga onki um trivna, áhuga, ídni og mentan.
Nú fær Pól Michelsen í les­arabrævið í farnu viku tað at síggja út sum um, at Tjóðveldisflokkurin er fyri at leggja teknisku skúlarnar saman. Men tað er ikki rætt! At meir enn tann eini limirin hevur tosað fyri hesum ger tað ikki til floksins støðu. Eg hugsi eisini, at Pól Michelsen lætt­iliga kundi funnið fleiri tinglimir í Fólkaflokkinum, sum kundu sagt tað sama sum Torbjørn. Men fyri tað er tað neyvan Fólkafloksins støða.
Sjálvt landsstýrismaðurin í skúlamálum, Jógvan á Lakjuni, umboðandi Fólk­a­flokk­in segði í ùtvarpinum í stilluviku, at tað hevði ver­ið skilagott, at lagt skúl­ar­nar saman, men tann re­al­politiska støðan var nú ein­a­ferð soleiðis, at tað bar neyvan til. Og tað var útfrá tí realpolitisku støðuni, at hann var noyddur at handla. Og tað var tí, at hann ikki legði skúlarnar saman, og ikki tí, at hann sum um­­boð­andi Fólkaflokkin í lands­­stýrinum ikki helt, at tað var rætt.
Og tá ið Pól Michelsen heldur so hánt um tað, sum eg havi ført fram um fíggingina av Tekniska skúla, so skilji eg ikki hesar at­finningar. Eg kann bara minna hann á, hvat í hann sjálvur segði um fíggingina av Hovs tunnlinum. Tá var hann, sum tann einasti fólk­a­flokspolitikkarin, sum kravdi, at tunnilin skuldi fíggjast sum vanlig íløga, har í játtað varð tað á fíggjarlógini, sum tað kost­aði tað árið. Soleiðis at virksemi sást aftur á fíggj­ar­lógini. Men nú knappliga er PM farin í kórið hjá teim­um sum siga, at hesin fígg­ingarháttur er ikki so tídn­ingarmikil kortini. Um Tekniski skúlin sum nú ætl­andi skal byggjast hevði ver­ið fíggjaður eftir vanligari mannagongd, har virksemi sást aftur á fíggjarlógini, so hevði tað merkt, at avsettar vóru einar 35 til 40 mió kr í fýra ár. Meðan samgongan velur eina loysn, har hon sig­ur 9 mió kr í 20 ár. Við tí avleiðing, at skúlin verður 30 mió kr dýrari samanlagt, og við tí avleiðing at virksemi í samfelagnum ikki sæst aftur á fíggjarlógini. Men eftir at skattalætti er givin uppá 240 milliónir krónur, avgjøld tik­in av B&O anleggum, rakstr­arstuðul innførdur aftur til vinnulívið, osfr alt meðan undirskotini á fíggjarlógini eru fleiri hundrað milliónir, so má man gera okkurt kre­a­tivt. Og hví ikki bara seta virksemi í gongd nú og senda rokningina út í framtíðina.
Eitt er fíggingarhátturin annað hvør skúli skal byggj­ast.
Tjóðveldisflokkurin hevur saman við Pól Michelsen hild­ið fast um at byggja ein miðnámsskúladepil við Marknagil ið kundi hýst øllum trimum mið­náms­skúl­u­num í Havn. Men tann ætl­anin er nú punkterað, við hjálp frá PM. Bara tí at ein av einogtjúgu er ímóti.
Men ikki nóg mikið við, at mann droppar mið­náms­skúladepilin. Men tað, sum verri er, er, at mann onki projekt hevur sett í staðin. Landsstýrismaðurin hevur fram­vegis ikki gjørt av, hvør skúli skal byggjast. Hann bið­ur bara um pengarnar, og so skal hann finna útav aftaná, at Løgtingi hevur játt­að honum pengarnar ein­a­ferð í næstu viku, hvat hann skal brúka pengarnar til. Frá tingsins røðarapalli segði hann, at tað fór hann at finna útav aftaná, at tingið hevði játtað pengarnar!
Soleiðis hvílir tann breiða semjan á éinum herðum.
So samanumtikið verður uttan iva einmæld semja í ting­inum fyri uppskotinum at játta fígging til bygging av Tekniska skúla í Havn. Við sitandi samgongu er onki alt­ernativ fyri skúlanum
Hetta sær jú út til at verða einasti mátin, ið samgongan unn­ir handverkaravinnuni ein tekniskan skúla. Men at talan er um ábyrgd­ar­leysa mannagongd bæði í fíggingini og í fyri­reik­ing­­ini, er harmiligt. Tí tað fyrireikandi arbeiði við­víkj­andi skúladeplinum var klárt, tá ið sitandi samgonga tók við, og fíggjarpolitikkurin frá 80-árunum var jarð­lagd­ur. Men samgongan hevur megnað at punkterað tað fyri­reikaða arbeiðið og kveistrar fíggjarstýring fyri borð.