Dagny Joensen
Tað hevur meir enn so hent, at løgmenn hava nýtt høvi at tosa um flokspolitik í løgmansrøðuni.
Tað var tí forvitnisligt at spyrja løgmann, um hann fór at tosa um sjónarmiðini hjá Fólkaflokkinum í løgmansrøðuni, men tað afturvísir Anfinn Kallsberg avgjørdur. Hann heldur ikki at tað er hóskandi.
Tað eru serligar umstøður hesaferð, nú sjálvstýrislandsstýri hevur leiðsluna, og vil gera nakað veruligt á sjálvstýrisleið.
Ríkisrættarligu viðurskiftini verða nevnd
Verður tað tikið upp í løgmansrøðu tíni?
Tað setir sjálvsagt dám á tann partin í røðuni, sum er um framtíðarætlaninar, og er eisini mál, sum vit hava sett okkum fyri at fremja í samgonguskjalinum. Tað fær tað plássið í røðuni, sum tað krevur, sigur løgmaður.
Um ríkisrættarligu viðurskiftini, verður nevnt í røðuni, hvat vit ætla at gera á sjálvstýrisleið, men ikki um innihaldið.
Tað kemst av, at vit ikki hava heimildina fyrr enn tingið hevur viðgjørt málið.
Í fyrstu atløgu fara vit at leggja uppskot til samtyktar fram í tinginum, har vit biða um heimild at samráðast við danir, og síðani skal aðalorðaskifti fara fram o.s.fr..
Løgmaður sigur, at hann hevur skilt á Høgna Hoydal, landsstýrismanni í lógarmálum, at Landsstýrið ikki er til reiðar at samráðast fyrr enn við árslok.
Stutt røða hesaferð
Løgmansrøðan er annars bygt upp eftir tí, sum landsstýrismenninir ætla at fremja á hvør sínum øki. Tað ætlar løgmaður at lata standa óbroytt.
Eg fari kortini ikki at halda eina langa løgmansrøðu, men bert gera nakrar útgreiningar av tí, sum stendur í samandráttinum.
Hvussu verður hjá tær at halda tína fyrstu løgmansrøðu?
Tað er torført at vera bundin av einum handriti. Øll míni ár í tinginum og í landsstýri, havi eg ongantíð hildið eina skrivaða røðu, so tað verður eitt sindur øðrvísi hesaferð, sigur løgmaður.
Um gongdina í samfelagnum, sigur løgmaður, at at gongdin í búskapinum ikki er heilt av leið, men at nøkur mál mugu fáast í rættlag, eitt nú er skuldin í landskassanum og í kommununum er ov stór, men hann heldur kortini, at tað fer at laga seg.
Tvungin at vera í Havn
Hvussu heldur løgmaður ólavsøku?
Eg havi í nógv ár verið tvungin at vera í Havn ólavsøkudag, men í ár verður tað øðrvísi, tí eg eri til arbeiðis, og havi ymsar uppgávur báðar dagarnar. Ólavsøkuaftan skal løgmaður m.a. handa útvarpssteypið, og ólavsøkudag er arbeiðsdagur í tinginum.
Tað eru nógv ár síðan eg var á ólavsøku sum vanligur gestur, og av tí at eg eri til arbeiðis, geri eg ikki so nógv burturúr, sigur løgmaður.
