Landsstýriskvinnan, Eyðgunn Samulsen, hevur gjørt av at seta pening av til at fara undir triðja og síðsta byggistig av Dugnaskúlanum. Tað skrivar Almannamálaráðið í tíðindabrævið í morgun. - Triðja byggistig fevnir um at betra um búeindina og undirvísingarhølini. Samstundis verða atkomuviðurskiftini betraði og brunaviðurskiftini endaliga dagførd, so skúlin lýkur øll neyðug krøv, skrivar ráðið.
- Dugna skúlin við Áir veitir endurbúgvingartilboð til vaksin, sum hava rørslutarn ella lættari persónligar, sinnisligar og ella sosialar trupulleikar. Endamálið við skúlanum er at menna næmingar og sjálvsálit teirra, soleiðis at tey gerast betur før fyri at møta teimum avbjóðingum, sum samfelagið býður, skrivar Eyðgunn Samuelsen.
Hetta verður gjørt við at undirvísa í fráfaringarroynd fólkaskúlans (9. ella partvíst 10. floks prógvi), og møguleiki er eisini at taka stakar lærugreinir. Eisini er ein fyrireikingarflokkur sum undirvísir næmingum í grundleggjandi lærugreinum, soleiðis at tey gerast før fyri at fara í 9. flokk. Skúlin hevur búdeild, har 8 pláss eru tøk, tá ið skúlin er opin. Á skúlanum er pláss fyri 18 næmingum í 9. flokki og fyri 12 næmingum í fyrireikingarflokkinum.
