Men triðju ferð eydnaðist tað Andy Burnham at gerast leiðari í bretska Labour-flokkinum, og í dag varð hann tikin í eið sum nýggjur forsætisráðharri í Bretlandi.
56 ára gamli Burnham tekur við einum flokki, sum er undir trýsti. Labour hevur mist undirtøku, og nýggi forsætisráðharrin skal royna at venda gongdini fram móti næsta tjóðartingsvali í 2029.
Andy Burnham hevur verið limur í Labour, síðani hann var 15 ára gamal. Hann las enskt á Cambridge University og arbeiddi seinni bæði hjá fakfeløgum og sum ráðgevi hjá Tony Blair, tá hesin var forsætisráðharri.
Burnham sat eisini á fleiri ráðharrastørvum undir stjórnini hjá Gordon Brown frá 2007 til 2010.
Eftir valósigurin hjá Labour í 2010 royndi hann fyrstu ferð at gerast formaður í flokkinum, men endaði aftast av fimm valevnum. Í 2015 royndi hann aftur, men tapti fyri Jeremy Corbyn.
Í 2017 vendi hann London bakið og varð valdur borgarstjóri í Greater Manchester. Tað starvið hevði hann, til hann í juni í ár varð valdur í Undirhúsið og seinni tók við leiðsluni í Labour.
Burnham verður ofta lýstur sum fólksligur og karismatiskur. Undir koronusóttini gjørdist hann kendur fyri at verja áhugamálini hjá Greater Manchester, og tað gav honum eyðnevnið "Kongurin í Norðri", við sipan til sjónvarpsrøðina Game of Thrones.
Robert Ford, professari í stjórnmálafrøði á University of Manchester, sigur við New York Times, at størsta styrkin hjá Burnham er evnið at samskifta.
– Hann dugir sera væl at greiða frá, hvør hann er, hvat hann stendur fyri og hvat hann vil røkka, sigur professarin.
Kortini hevur Burnham eisini verið sera atfinningarsamur. Mótstøðufólk halda, at hann ofta broytir politiskar meiningar eftir, hvussu politiski vindurin blæsur.
Fyrrverandi Labour-leiðarin Keir Starmer gjørdi enntá gjøldur burtur úr hesum eftir HM í fótbólti í 2022. Tá segði hann, at Burnham hevði fingið høvi at síggja "sítt barndómslandslið" Argentina vinna HM, men eisini "síni barndómslandslið" Frakland, Marokko og Kroatia tapa.
Nú stendur Andy Burnham kortini á odda fyri bæði Labour og bretsku stjórnini – eftir at hava roynt tríggjar ferðir at røkka ovasta politiska sessinum.
