Tað var væntandi, at Newcastle-liðið fór at verða ógvuliga sterkt í mun til tað føroyska, men sum dysturin leið, gjørdist greitt, at føroyska liðið var væl við. Newcastle-spælararnir eru í holt við sína pre-season venjing og tað sást aftur til tíðir. Tað tekur tó einki frá føroyska innsatsinum.
Í fyrra hálvleiki hevði Newcastle meira spæl og í løtum sást munur á liðnum báðum, men sum hálvleikurin gekk, kom føroyska liðið fyri seg. Í seinasta álopinum í fyrra hálvleiki legði Newcastle seg á odda, eftir at føroyska liðið misi bóltin í uppspælinum.
Í seinna hálvleiki kom føroyska liðið veruliga fyri seg og var til tíðir omaná. Mitt í seinna hálvleiki javnaði Gunnar Zachariassen eftir uppspæl frá innskifta Pál Joensen, sum úr vinstru síðu spældi innfyri til Gunnar, sum var leysur og tryggur framman fyri málinum.
Jóan Símun brendi
Millum mótstøðumenninar var føroyski Newcastle-spælarin, Jóan Símun Edmundsson, og løtu eftir útjavnandi málið gjørdi føroyska verjan brotsspark ímóti Jóan Símuni. Hann varð sjálvur settur at skjóta, men Teitur Gestsson í føroyska málinum bjargaði!
Í seinasta álopinum í dystinum fingu føroyingar hornaspark í høgru síðu. Sørmund Kalsø, sum spældi allan dystin í miðverjuni, var hægstur og stútaði bóltin í kassan til endaliga úrslitið, sum altso gjørdist 2-1 til føroyska U19-landsliðið.
Millum áskoðararnir vóru Newcastle-venjarin, Chris Hughton, og fyrrverandi Liverpool- og Newcastle-spælarin. Peter Beardsley. Á odda fyri Newcastle-liðnum stóð Colin Calderwood, sum á sinni var inni í myndini at gerast føroyskur landsliðsvenjari.
Eftir dystin var Chris Hughton nøgdur við mótstøðuna, frá føroyska U19-liðnum Ábraham Løkin, venjari hjá U19-landsliðnum, var væl nøgdur við føroyska innsatsin og úrslitið. Hann læt eisini væl at umstøðunum og tí sum liðið hevði fingið burtur úr á ferðini í Newcastle.
Teir yngru taptu
Eisini hini bæði ungdómslandsliðini spældu mikudagin. U17-landsliðið tapti 3-0 fyri Whitley Bay FC, sum er eitt lið uttan fyri Newcastle. Aftur her var stórur munur á likamligu styrkini á liðunum, og onkur av mótstøðuspælarunum mundi helst táttað í tey 20 árini. U17-liðið vísti gott spæl til tíðir og kundi við størri neyvleika havt skorað bæði eitt og tvey mál.
U15-landsliðið tapti 2-0 fyri Wallsend Boys Club, ið hevur fostrað spælarar sum Alan Shearer og Peter Beardsley. Tekniskt stóðu føroyingarnir ikki nógv aftanfyri, men likamliga vóru teir við undirlutan. Til tíðir spældi U15-liðið góðan fótbólt, men hevði trupult við at skapa teir stóru málmøguleikarnar.
