Nógv stendur uppá spæl tá Føroyar spæla Nations League dyst ímóti Malta á Ta´Qali leikvøllinum klokkan 19.45 í kvøld.
Umframt at stríðast fyri at sleppa undan aftasta plássinum í bólki 3, og at sleppa undan at detta úr næstniðasta styrkisbólkinum til komandi EM-undankappingarlutakastið, so er eitt met hjá Lars Olsen eisini uppá spæl.
Tá Allan Simonsen var landsliðsvenjari, árini 1994 til 2001 vann Allan Simonsen átta dystir við føroyska landsliðnum. Í EM-undankapping vann Allan Simonsen við Føroyum heima og úti ímóti San Marino (3-0 og 3-1). Í HM-undankapping vann Allan Simonsen við Føroyum heima og úti ímóti Malta (2-1 og 2-1), Allan Simonsen vann eisini heima og úti í HM-undankapping ímóti Luksemborg (2-0 og 1-0). Haraftrat vann Allan Simonsen tveir venjingardystir Við Føroyum, 2-0 úti ímóti Estlandi og 1-0 úti ímóti Liktinstein.
Lars Olsen hevur við 3-1 sigrinum á Malta á Tórsvølli 7. september vunnið átta dystir við føroyska landsliðnum. Í seinastu EM-undankappingini vann Lars Olsen við Føroyum 1-0 og 2-1 á Grikkalandi. Í seinastu HM-undankappingini vann Lars Olsen við Føroyum 1-0 á Andorra heima og 2-0 ímóti Lettlandi úti. Lars Olsen hevur við føroyska landsliðnum vunnið tríggjar venjingardystir. 3-0 á Liktinstein í vár, og 3-2 á Liktinstein fyri tveimum og einum hálvum ári síðani. Í 2014 vann Lars Olsen við føroyska landsliðnum 4-1 á Gibraltar á útivølli. Lars Olsen er sostatt ein sigur frá at gerast mest vinnandi føroyski landsliðsvenjarin nakrantíð.
So er at vóna og krossa fingrar og tær fyri, at Lars Olsen fær metið í kvøld.
Tróndur Arge sigur beinleiðis frá dystinum millum Malta og Føroyar á FM1 í kvøld. Dysturin byrjar klokkan 19.45. Sendingin byrjar aftaná tíðindasendingina sum verður klokkan 18.30.
Øll kunnu hoyra frásøgnina á www.midlar.fo. Vanligu frekvensirnir hjá FM1 eru FM 88,7, FM 91,7, FM 93,9, FM 95,5 og FM 98,7.
Ljóðsamrøður við spælarar og venjara koma út á in.fo seinni í kvøld. In.fo hevur beinleiðis tekstfrásøgn frá dystinum.
