Tað verður ikki bara ein radari, sum skal hava eftirlit við fremmandum maktum í føroyskum øki í framtíðini. Tí umframt radaran skulu framkomnar dronur eisini verða stationeraðar umborð á verjuskipunum, sum sigla her í økinum.
Tað váttar Jenis av Rana, landsstýrismaður í uttanríkismálum, fyri in.fo í morgun.
Longu í arktisku analysuni frá 2016 bleiv hugskotið um dronueftirlit í Arktis luftað, tí sambært analysuni kunnu dronur hjálpa til við samlaða eftirlitinum í Arktis. Og dronur eru eisini partur av arktiska kapacitetspakkanum, sum radarin eisini er við í. Har vóru 750 milliónir krónur settar av til eftirlit við langtrøkkandi dronum í Grønlandi.
Eftir øllum at døma er eisini ætlanin at fáa okkurt slag av dronueftiriti í Føroyum.
Hetta slagi av dronum eru lítlar eftirlitsdronur, sum minna um tær, vit kenna frá gerandisbrúki, tó meira framkomnar. Men í sambandi við verju í Arktis verður eisini tosað um væl størri dronur, sum hava eitt veingjabreiði á 24 metrar. Talan er sambært Arktisk Kommando ikki um hetta slagi av dronum, men um lítlar eftirlitsdronur, sum helst minnir um tær frá Brimli.
Umframt at hava eftirlit við sjóøkinum, so kunnu dronurnar eisini brúkast til hjálparvetingar.
– Munurin á einum helikoptara og einari dronu er, at dronan kann fara avstað beinanvegin. Dronan kemur á staðið skjótt, um ein vanlukka verður, og tær kunnu hava bjargingarkransar og bátar við sær, sum tær kunnu sleppa niður til eitt nú skip í neyðstøðu, fortelur Jenis av Rana.
– Men endamálið við teimum er sjálvandi at vera tøkar til NATO-verjuna, sigur Jenis av Rana, sum ikki avvísir, at dronur eisini kunnu vera umborð á føroysku verjuskipinum.
Nær dronurnar koma, er ikki greitt enn.
