Tað var fyri tveimum mánaðum síðani, at Gunnar í Liða boðaði frá, at hann fer úr starvi sum stjóri á Tryggingarfelagnum Føroyar av persónligum orsøkum. Hann hevur starvast hjá Tryggingini í fleiri enn 15 ár, harav stívliga 10 ár sum stjóri.
Regin Hammer er 37 ára gamal og hevur Master útbúgving í búskapi frá University of Dundee. Hann hevur verið stjóri í egnari ráðgevingarfyritøku síðani 2006 og m.a. verið umboðsmaður fyri DONG Energy A/S seinastu árini.
Samstundis sum stjóraskifti fer fram í Tryggingarfelagnum Føroyum er felagið í samráðingum við Finansiel Stabilitet um keyp av Eik Banka. Alment er tað enn bara Tryggingarfelagið Føroyar - gjøgnum móðurfelagið TF Holding - sum hevur víst áhuga í at keypa bankan, sum fór av knóranum 30. september.
Sølutilgongdin hevur ikki gingið so lætt, sum Finansiel Stabilitet ætlaði, og enn er óvist, um handilin verður veruleiki - hann er blivin bæði jólatrøll og nýggjárstrøll.
Tað verður so helst uppgávan hjá nýggja stjóranum at finna fram til, um handilin verður egg ella ungi.
