Vit eiga at leggja árar í sjógv fyri at fáa ES at víðka fríhandilsavtaluna.
Hetta er lykilin, sum kann lata hurðina til ES marknaðin upp á víðan vegg.
Meginparturin av makrelinum, sum kemur upp á land í Føroyum verður heilfrystur, óviðgjørdur.
Síðani verður hann seldur til ymiskar útlendskar fyritøkur, sum framleiða góðskaðar vørur, sum helst allar enda á ES marknaðinum, so sum:
Makrelfløk
Roykt makrelfløk
Makrel í tomat (í dós)
Makrel í tomat (í tubum)
Makrel guf
o.s.v
Vit eiga at leggja stóran dent á at framleiða virðisøktar hágóðskuvørur í Føroyum og taka kappingina upp við útlendsku fyritøkurnar.
Vit hava serligar møguleikar í Føroyum, tí við at framleiða ófrysta feska vøru, hava vit serliga góðsku.
Tað er at gleðast yvir, at vit hava fyritøkur í Føroyum, sum hava megnað at bygt góð og vælútgjørd uppisjóvarvirkir í landinum. Hesi eru før fyri at taka ímóti nærum øllum makrelinum, sum vit fiska.
Hetta ger at skipini, ístaðin fyri at landa uttanlands, leggja fiskin upp á land í Føroyum, soleiðis at allir føroyingar hava atgongd til fiskin.
Hetta gevur eisini smærri fyritøkum møguleika at keypa fyrstafloks feska rávøru til hágóðskuframleiðslu við stórari virðisøking.
Hesar smáu fyritøkur kunnu, hvør í sínum lagi, serframleiða sínar vørur til ymisku sermarknaðirnar í ES, sum vanliga gjalda besta prísin.
Fólkaflokkurin vil betra um atgongdina til váðafúsan kapital hjá íverksetarum, t.d. gjøgnum grunnar hjá landinum.
Støðan í løtuni er tann, at góðskaðar vørur av makreli gjalda toll á veg inn í ES, hetta merkir ikki, at tílík framleiðsla ikki er gjørlig í Føroyum, men hetta er ein forðing, sum má fáast burtur.
Fólkaflokkurin vil leggja allar kreftir í til tess at víðka fríhandilsavtaluna við ES, til eisini at fevna um góðskaðar makrelvørur, eins væl og allar aðrar fiskavørur.
Lat okkum vísa útlendingum, at í Føroyum duga vit ikki ”bara” at fiska, men eisini at framleiða.
Lat okkum vísa teimum, at vit eisini eru í serflokki tá ið framleiðslu og góðsku umræður.
Joen Magnus Rasmussen
Valevni Fólkafloksins
