Um lógaruppskotið eisini fær endaliga góðkenning, verður Frakland eitt av fleiri evropeiskum londum, sum loyva aktivum deyðahjálp ella hjálp til sjálvmorð undir ávísum treytum.
Her er eitt yvirlit:
Niðurlond vóru fyrsta evropeiska landið at loyva virknari deyðshjálp í 2002. Í dag kunnu eisini børn niður í 12 ára aldur fáa virkna deyðshjálp undir ávísum treytum.
Belgia gjørdi eisini virkna deyðshjálp lógliga í 2002. Síðani 2014 hava eisini deyðiliga sjúk børn í øllum aldri kunnað søkt um hjálp til at doyggja.
Luksemborg avkriminaliseraði bæði virkna deyðshjálp og hjálp til sjálvmorð í 2009.
Sveis loyvir ikki virknari deyðshjálp, men hevur í mong ár loyvt hjálp til sjálvmorð, so leingi hon ikki verður veitt av egoistiskum orsøkum. Tí ferðast nógv fólk úr øðrum londum til Sveis fyri at fáa hesa hjálpina.
Eysturríki samtykti í 2021 at loyva hjálp til sjálvmorð hjá fólki við álvarsamari ella ólekjandi sjúku.
Spania samtykti sama ár eina lóg, sum loyvir bæði virknari deyðshjálp og læknahjálp til at enda lívið undir strongum treytum.
Italia loyvir framvegis ikki virknari deyðshjálp. Men síðani 2019 hevur hjálp til sjálvmorð verið loyvd í ávísum førum sambært avgerð hjá grundlógardómstólinum, hóast landið framvegis manglar neyðugu lóggávuna.
Framvegis kjak í fleiri londum
Í Slovenia varð ein lóg um hjálp til at doyggja samtykt, men hon varð seinni sett úr gildi eftir fólkaatkvøðu.
Í Portugal varð ein lóg samtykt í 2023, men grundlógardómstólurin steðgaði henni, áðrenn hon kom í gildi.
Í Bretlandi er málið framvegis til kjak. Undirhúsið hevur áður samtykt eitt lógaruppskot, men Yvirhúsið steðgaði tí. Málið verður aftur viðgjørt í september.
