Løgreglan skrásetti 15 ferðsluóhapp í Sands kommunu frá 2014 til 2024.
11 teirra vóru á kommunalum vegum, og fýra vóru á landsvegnum.
Samstundis hava børn og vaksin peikað á 14 vegastrekkir og vegamót, har tey kenna seg ótrygg.
Tølini standa í ferðslutrygdarætlanini fyri kommunalu vegirnar og landsvegirnar í Sands kommunu fyri árini 2025–2029.
Sambært ætlanini eru eingir sokallaðir svartir blettir, har fleiri skrásett óhapp savnast. Upplýsingarnar í óhappsfrágreiðingunum eru eisini avmarkaðar.
Tað sæst tí ikki altíð, hví óhappini hendu, hvørjir ferðslupartar vóru við, ella hvørjar avleiðingarnar vóru.
Minni óhapp kunnu mangla
Tey 15 óhappini eru bert tey, sum løgreglan hevur skrásett.
Ferðslutrygdarætlanin vísir á, at minni óhapp ikki altíð verða fráboðað løgregluni. Tí kann veruliga talið vera hægri.
Harumframt hava borgarar greitt frá fleiri nærumóhappum á ymiskum støðum. Nærumóhappini eru ikki partur av teimum 15 løgregluskrásettu óhappunum.
Fleiri vegir kunnu gerast einvegis
Ætlanin hevur eina røð av uppskotum til at broyta ferðsluna í bygdini.
Undir Reynum verður skotið upp at gera einvegis omaneftir. Tað skal millum annað gera leiðina millum Sands skúla og frítíðarskúlan tryggari.
Tvørgøta verður eisini skotin upp at verða einvegis oman móti Heimasandsvegi. Borgarar hava greitt frá fleiri óhappum og nærumóhappum við Tvørgøtu, har sýnið er avmarkað.
Í Soylu kann somuleiðis gerast einvegis, meðan vegurin Í Koytu annaðhvørt kann gerast blindur ella einvegis.
Einvegisloysnirnar verða í flestu førum mettar at kosta millum 50.000 og 75.000 krónur. Størri umbyggingin Í Koytu verður tó mett at kosta umleið 500.000 krónur.
Endalig ætlan við ógreiðum endamáli
Ferðslutrygdarætlanin er dagfest 17. juni 2025 og verður nevnd ein endalig ætlan. Kortini er ikki ásett, nær einstøku tiltøkini skulu fremjast.
Fleiri uppskot hava heldur onga kostnaðarmeting. Tað er millum annað galdandi fyri ljósætlanina og samlaðu broytingarnar við Sands skúla.
Í skjalinum stendur, at ein raðfestur arbeiðslisti skal síggjast á næstu síðu, men eingin greiður, samlaður arbeiðslisti við tíðarfreistum og fígging sæst har.
Sambært ætlanini skulu tiltøkini fremjast í raðfylgju og so hvørt, sum fígging verður tøk á fíggjarætlanini. Raðfestingin skal endurskoðast á hvørjum ári.
Tað er tó ikki greitt í skjalinum, hvørji tiltøk verða framd fyrst, hvussu nógv verður játtað, ella nær arbeiðið byrjar.
