Ansni er ikki bara eitt vaktarfelag. Ymisku tænasturnar, sum felagið veitir, fevna rættiliga breitt.
Aimi Justinussen, fyrisitingar- og marknaðarleiðari hjá Ansni, vísir á, at Ansni í dag hevur fimm virkisøki.
- Vit hava traditionellu vaktina, og vit hava ávaringarskipanir og vakingartól. Vit hava call-sentur, har vit taka telefonina fyri eitt nú virkir og stovnar, bæði dag og nátt.
Hon vísir á, at Ansni eisini hevur yvirvaking av ávaringarskipanum, bæði sum eldávaring og skipanir í samband við innbrot, og fyritøkan hevur eisini eftirlit við lyftum og ymiskum skipanum á virkjum, har neyðugt eitt nú er við støðugum hita ella kulda.
- Vit veita flutningshjálp, har vit flyta bilar, bingjur og annað, og vit hava tað, vit rópa tilbúgving við frálæru í fyrstuhjálp og nýtslu av hjartastartara, eins og vit eisini hava einaumboð upp á hjartastartara.
Aimi Justinussen sigur, at nýggjasta tænastan, sum Ansni nú eisini veitir, er tað, tey rópa heilsueftirlit, og við hesi tænastu kann fyritøkan veita heilsukanningar til starvsfólk á stovnum og virkjum.
- Kanningin fevnir vanliga um blóðtrýst, blóðsukur, BMI (vekt, hædd og miðjumát), kolesterol og lungnavirkni.
Aimi Justinussen, fyrisitingar- og marknaðarleiðari, sigur, at heilsukanningin, sum Ansni bjóðar, verður framd av sjúkrarøktarfrøðingi undir trúnaði.
