Fríggjadagin hátíðarhalda Birgit og Svenning av Lofit 50 brúðleypsdag teirra. Dagurin verður hildin í Dansifrøi har eini 440 fólk hava teknað seg til at halda dagin saman við teimun
Eftir hondini er tað ikki tann føroyingurin sum hevur verið eina Ísraelsferð við Svenning av Lofti.
Babba hevur havt ferðalag til Ísrael í útvið 40 ár. Hetta byrjaði við Andrian Johansen sála fyrst í 70'unum. Síðani tók pápi okkara sjálvur táttin upp, sum ungur og óroyndur á umráðnum. Sum tað er sagt so mangan, so hevur tað altíð fallið honum lætt at fáast við menniskju, so hendan uppgávan at skipa ferðalag til Ísrael hevur kanska ikki verið so stór fyri hann.
Tað er altíð tungt at stápla nakað upp á beinini, tað tekur tíð og kann vera sera strævið.
Babba fann skjótt góðar starvsfelagar í Ísrael, sum til dagin í dag hava verið við til at givið mongum føroyingi tað stóra upplivilsi at uppliva heilaga landið. Hermon Tours sum tað byrjaði við, er nú Loftiferðir. Hetta er nú eitt meiri fyriskipað fyritakandi, har babba hevur fingið góð fólk afturat sær. Her eru Maigunn Otthamar og Marner bróður.
Eingin behøvist at óttast fyri at hesar ferðir detta niðurfyri, tí m.a. hevur Marner sera stóran áhuga í Ísrael, og hevur hann verið sera góð hjálp hjá babba á fleiri ferðum. Ein kann nokk siga at ferðleiðari eftir pápa okkara verður óivað Marner. Babba hevur verið yvir 100 ferðir í Ísrael, og mamma hevur verið við sum góð hjálp hjá honum fleiri ferðir.
Babba hevur verið virkin á nógvum økjum. Hann hevur verið formaður í Sinnisbata (felagið teirra sálarveiku) í skúlaráðnum, Ísraelsfelagnum og øðrum við. Tað hevur altíð fallið honum lætt at fáast við menniskju og tí hevur nokk eisini verið lætt hjá honum at taka av slíkum áheitanum. Tað nýggjasta er so eldraráðið í Tórshavnar kommunu, har hann er valdur inn.
Foreldur okkara hava verið sera virkin á sjálvboðnum arbeiði. Pápa okkara minnast vit frá trúboðaravirksemi. Mamma okkara var heima hjá okkum øll tey ár við vóru smáir. Tað var ikki fyrr enn mamma var um tey 50 árini, at vit minnast at hennara dagliga gongd gekk oman á vaskaríið á Hafnia til arbeiðis.
Um barnagarðsaldur minnist eg pápa arbeiða í Gamla Bókahandli og mammu sum tá arbeiddi um ”smyrjubreyðsjomfrú” á Hafnia. Babba hevur nokk verið um tey 45, tá hann gavst í bókahandlinum og fór at virka fulla tíð sum trúboðari. Mamma hevur tó kunna tillagað sítt arbeiði á Hotel Hafnia eftir teirru umstøðum sum hava verið. Onkuntíð lang tíðarskeið á hotelinum, aðrar tíðir stytri.
Góðveðursdagar var ikki óvanligt at mamma og pápi tóku okkum við á Norðradalsskarð, ella á Velbastaðháls. Mamma hevði smurt okkum ein góðan matpakka og fóru vit so út í friðsælu náttúruna. Her fingu vit okkum ein góðan drekkamunn og okkurt ábit. Onkuntíð settu vit telt upp og spældu ymiskt spøl. Her høvdu vit sum familja eina fantastiska samveru. Hesar løtur/dagar plagar babba oftani at spyrja aftur til – og ja sjálvfylgjandi minnast vit aftur á hesar ógloymandi dagar.
Sjúkrahúsvitjanir. Mamma og babba hava vitjað nógv menniskju, sum hava verið innløgd fyri eitthvørt. Tey hava sungið, biðið og hildið eina andakt fyri teimum. Hava tey frætt um fólk ið eru innløgd, eru tey farin á vitjan fyri at gleða tey og geva teimum eitt gott orð. Hesi menniskju eru bæði innan teirra trúarrørslu og onnur við. Tey hava aldrin hildið seg aftur viðvíkjandi andaligari sannføring. Tey hava altíð vilja fortalt um gleðiboðskapin, og at jesus doyði fyri teirra/okkara syndir.
Um tað hava verið eldri og veik menniskju sum hava havt brúk fyri einari uppbyggjandi løtu, hava tey bjóða hesum heim til okkum á Sólteigi. Tað kann vera frá innivist til ein døgurða ella nátturðabita. Tey eru glað at fáa vitjan, og hava tey tað best við at kunna gleða onnur.
Tað hevur ikki verið óvanligt at babba og mamma bjóða ferðafólkum á gátt í heimi teirra. Tað er meiri enn so hent seg, at babba er komin í prát við útlendingar ein illveðursdag í býnum, har hann hevur bjóðað hesum heim til ein heitan drekkamunn. Har hava tey givið teimum eitt gott orð, sungið saman o.a
Ja, alt hetta lýsir foreldur okkara so sera væl. Tey hava eitt stórt hjarta fyri, hvussu onnur hava tað. Á hendan hátt hava tey eisini nomið sær kennskap við nógv ymiskt fólk runt heimin, har tey enn halda samskiftið viðlíka.
Ein kundi óivað nevnt nógv onnur ting afturat, men hettar verður so tað á hesum sinni.
Vit ynskja tykkum ein fantastiskan dag.
Hendan heilsan er frá børnum, barnabørnum og verdóttrum.
------
Petur, Marner, Unn, Rebekka, Barbara, Dan, Mathilda
