KÍ hevur gjørt ein tvey ára sáttmála við 17 ára gamla Dávid B. Andreasen. Hann er sonur Jan B. Andreasen, og beiggi hansara er liðskiparin á KÍ-liðnum, Jákup B. Andreasen.
Ungi miðvallarin hevur longu víst seg fram á besta liðnum hjá KÍ, tá hann skoraði eitt vakurt mál móti TB. Tað var hansara einasti dystur í landskappingini og tað bleiv til 15. minuttir. Í KÍ vóna tey, at tað blívur til fleiri minuttir í komandi kappingarárinum.
KÍ skrivar í tíðindaskrivi:
Ungi Dávid B. Andreasen hevur undirskrivað ein tvey ára sáttmála við KÍ. 17 ára gamli Dávid B. Andreasen spældi ein dyst fyri Betri Menn í fjør, og upp á 15 minuttir skoraði hann eisini eitt mál.
Dávid B. Andreasen var eisini partur av hópinum, sum fór til Riga í lettlandi at spæla UEFA Conference League í fjør summar. Vit vóna at síggja meira til Dávid á vøllinum í ár og bestu eydnu.
