– Eg vænti ikki, at Fólkaflokkurin tekur undir við hesum »kopipolitikkinum« hjá landsstýrinum.
Tað sigur Jacob Vestergaard, løgtingsmaður, tá vit spyrja hann, um Fólkaflokkurin fer at taka undir við uppskotinum hjá Sirið Stenberg, landsstýriskvinnu í uttanríkismálum, um at svartlista russisku reiðaríini Murman SeaFood og Norebo JSC, sum hava fiskiloyvi í føroyskum sjógvi, og sum eru millum tey sum í ES eru undir illgruna fyri hybridatgerðir, og sum sostatt koma undir strong avmarkandi tiltøk.
– Eg taki so ikki undir við hasum, og eg rokni ikki við, at Fólkaflokkurin tekur undir við tí, sigur Jacob Vestergaard, sum verður framsøgumaður fyri Fólkaflokkin í málinum og sum er limur í Uttanlandsnevndini hjá Løgtinginum. Hann sigur, at flokkurin hevur ikki umrøtt tað, tí tey hava ikki havt fund enn.
– Eg dugi ikki at síggja, hví vit skulu renna aftan á ES og Noreg eftir hvat tey halda. Har er einki ítøkiligt um hasi skipini, og hava vit einki ítøkiligt ímóti teimum, so eiga vit ikki at svartlista tey, sigur Jacob Vestergaard.
– Síggja vit okkurt ítøkiligt, so eiga vit at taka støðu til tað, sigur hann.
– Eg síggi einki ítøkiligt av nøkrum slag. Man »metir at« og so framvegis. Og so tosar man um tey, sum eru samsint við okkum.
– ES og Noreg eru ikki samsint við okkum. Tað hava tey ongantíð verið. Vit hava kríggjast við tey um fisk, í øllum førum ta tíðina, eg havi verið í Fiskimálaráðnum. Og tey hava brúkt somu metodur ímóti okkum, sum tey nú brúka ímóti Russlandi.
– So at vera samsint við hasi londini, tað eru vit ikki, sjálvt um vit eru upp á bylgjulongd upp á ymiskar mátar, so eru vit slett ikki upp á bylgjulongd, tá tað snýr seg um tað, sum er tilverugrundarlagið hjá okkum búskaparliga.
– So eg kann ikki ímynda mær, at Fólkaflokkurin tekur undir við hasum. Eg veit ikki hví vit skulu hava ein »kopipolitikk« og ikki hava okkara egnu hugsanir. Eg hoyri, at tey hava ikki sínar egnu hugsanir, eg hoyri at tey argumentera við ES og Noreg.
– Men hevur Fólkaflokkurin ikki eisini sagt, at vit skulu lena okkum upp at ES og Noreg í málinum um tiltøk ímóti Russlandi?
– Jú, tað er møguligt í teimum tiltøkunum um boykott í móti Russlandi.
– Vit royndu at halda fiskivinnuna uttanfyri tá, tí vit hava einki samstarv við Russland uttan tað sum hevur við fiskivinnu at gera. Vit útflyta ikki komponentar til kríggj. Hinvegin haldi eg ikki, at Føroyar skuldi verið transitland fyri slíkt.
– Tað kann vera, at onkur okkara hevur hildið, at vit skuldu lena okkum upp at ES og Noreg, og eg brúkti tað sjálvur sum eitt kompromis. Og tað var meira tí, at Noreg opnaði tríggjar havnir fyri russisk skip, so eg brúkti tað sum argumentatión, tá tey flestu vóru ímóti at lata russarar koma í føroyska havn – so hví fylgdu tey ikki Noreg, sum lat nakrar havnir vera opnar, sigur Jacob Vestergaard.
Jacob Vestergaard leggur dent á, at hann tosar fyri seg sjálvan.
– Hetta er mín hugsan, og tað er tann hugsan, sum Fólkaflokkurin hevur havt, og eg rokni við, at støðan er tann sama, sigur hann.
