Um dagarnar gjørdist greitt, at navnið Sandavágs Timburhandil nú fer í søguna, men tað merkir ikki, at virksemið á Giljanesi heldur uppat.
Borg, sum Rodmundur Nielsen eigur og rekur, hevur keypt Sandavágs Timburhandil. Starvsfólkini halda fram, og virksemið verður rikið sum frammanundan.
Sandavágs Timburhandil verður partur av Borg-samtakinum og verður í framtíðini - um kappingareftirlitið góðkennir keypið - rikin undir navninum, Borg.
Borg er heildarveitari innan byggivinnuna og eigur og rekur Borg á Glyvrum, sum læt upp í stórum og nýggjum hølum fyri sløkum ári síðan.
Samtakið eigur eisini timburhandilin í Klaksvík, sum áður var Klaksvíkar Timburhandil, og fyri nøkrum árum síðan keypti samtakið eisini Havnar Timburhandil.
Soleiðis hevur Borg-samtakið nú handlar bæði í Klaksvík, Glyvrum, Havn og á Giljanesi.
Rodmundur Nielsen sigur, at við keypinum av Sandavágs Timburhandli veksur marknaðarparturin, og samtakið verður enn meira landsdekkandi enn áður - ikki minst í Vágum og Norðstreymoy.
##med2##
- Við keypinum av Sandavágs Timburhandli nærkast vit nú 100 starvsfólkum, harav sløk 20 arbeiða á deildini í Vágum og nakað tað sama á deildini í Klaksvík.
Rodmundur Nielsen sigur, at eini 25 fólk eru knýtt at deildini í Havn, og síðan eru hini á Glyvrum, har Borg læt upp í nýggum og stórum bygningi hin 31. mai í fjør.
- Vit hava ógvuliga góð, dugnalig og loyal starvsfólk, harav fleiri hava verið í fyritøkuni í mong ár. Starvsfólkini eru altavgerandi fyri virksemið hjá okkum, sigur eigarin.
Rodmundur Nielsen sigur, at nýggju starvsfólkini, sum samtakið fær aftrat við keypinum í Vágum, eru hjartaliga vælkomin í Borg-samtakið.
